ചിറ്റോര്ഗഢ്: വന്ദേമാതരം വിവാദത്തില് കോണ്ഗ്രസ് നേതൃത്വത്തിനെതിരെ രൂക്ഷ വിമര്ശനവുമായി അമിത് ഷാ. രാജസ്ഥാനിലെ ചിറ്റോര്ഗഢില് വിവിധ വികസന പദ്ധതികള്ക്ക് തുടക്കം കുറിച്ച് സംസാരിക്കുകയായിരുന്നു അദ്ദേഹം. നിംബഹേരയില് 21 അടി ഉയരമുള്ള മുന് പ്രധാനമന്ത്രി അടല് ബിഹാരി വാജ്പേയിയുടെ പ്രതിമ അനാച്ഛാദനം ചെയ്തതിനു പുറമെ 5,959 കോടി രൂപയുടെ വിവിധ വികസന പദ്ധതികള്ക്കും അദ്ദേഹം തുടക്കം കുറിച്ചു.
80-ാം സ്വാതന്ത്ര്യദിനത്തില് ചെങ്കോട്ടയില് നിന്ന് വന്ദേമാതരം ആലപിച്ചത് ചരിത്രനിമിഷമാണെന്ന് അമിത് ഷാ പറഞ്ഞു. എന്നാല് വോട്ട് ബാങ്ക് രാഷ്ട്രീയത്തിന്റെ പേരില് കോണ്ഗ്രസ് വന്ദേമാതരത്തെ മറന്നുവെന്നും സ്വാതന്ത്ര്യദിനത്തില് ദേശീയഗാനത്തെ അപമാനിച്ചെന്നും അദ്ദേഹം ആരോപിച്ചു. കോണ്ഗ്രസ് ആസ്ഥാനത്ത് നടന്ന സ്വാതന്ത്ര്യദിന പരിപാടിയില് വന്ദേമാതരം ആലപിക്കുന്നതിനിടെ സോണിയ ഗാന്ധി പാര്ട്ടി അധ്യക്ഷന് മല്ലികാര്ജുന് ഖാര്ഗെയോട് ഗാനം നിര്ത്താന് ആവശ്യപ്പെട്ടെന്നാണ് അമിത് ഷായുടെ ആരോപണം. ”നാമെല്ലാവരും ഇത് ടെലിവിഷനില് കണ്ടു,” അദ്ദേഹം പറഞ്ഞു.
വന്ദേമാതരം അപൂര്ണമായി നിര്ത്തിയ സംഭവത്തില് കോണ്ഗ്രസ് ജനങ്ങളോടും ഗാനം രചിച്ച ബങ്കിംചന്ദ്ര ചട്ടോപാധ്യായയുടെ അനശ്വര ആത്മാവിനോടും മാപ്പ് പറയണമെന്ന് അമിത് ഷാ ആവശ്യപ്പെട്ടു. രാജ്യത്തെ ജനങ്ങള് ഈ നടപടിക്ക് മാപ്പ് നല്കില്ലെന്നും അദ്ദേഹം പറഞ്ഞു. പരിപാടിക്കിടെ വാജ്പേയിയുടെ സംഭാവനകളെയും അമിത് ഷാ അനുസ്മരിച്ചു. പൊഖ്റാന് ആണവപരീക്ഷണങ്ങളിലൂടെ ഇന്ത്യയെ ആണവശക്തിയാക്കിയതിലും റോഡ് അടിസ്ഥാനസൗകര്യ വികസനത്തിലും ഗോത്രവര്ഗ ക്ഷേമത്തിനായി പ്രത്യേക മന്ത്രാലയം രൂപീകരിച്ചതിലും വാജ്പേയി നിര്ണായക പങ്കുവഹിച്ചെന്ന് അദ്ദേഹം പറഞ്ഞു.
