തിരുവനന്തപുരം: കേരളത്തിന്റെ സമുദ്രവ്യാപാര ചരിത്രത്തിൽ നിർണായക അധ്യായത്തിന് ഇന്ന് തുടക്കമാകുന്നു. വിഴിഞ്ഞം അന്താരാഷ്ട്ര തുറമുഖത്ത് സമ്പൂർണ കയറ്റുമതി-ഇറക്കുമതി (EXIM) പ്രവർത്തനങ്ങൾക്ക് ഇന്ന് തുടക്കം കുറിക്കും. രാവിലെ 10.45ന് നടക്കുന്ന ചടങ്ങിൽ മുഖ്യമന്ത്രി വി.ഡി. സതീശൻ ആദ്യ കയറ്റുമതി കണ്ടെയ്നർ ഫ്ലാഗ് ഓഫ് ചെയ്യും. കേന്ദ്ര തുറമുഖ, കപ്പൽ ഗതാഗത മന്ത്രി സർബാനന്ദ സോനോവാൾ ചടങ്ങിൽ മുഖ്യാതിഥിയാകും.
ഇതോടൊപ്പം കേരളത്തിന്റെ സമുദ്രാധിഷ്ഠിത സാമ്പത്തിക വികസനത്തിന് ലക്ഷ്യമിടുന്ന ‘മിഷൻ സമുദ്ര’ പദ്ധതിയുടെ പ്രഖ്യാപനവും ലോഗോ പ്രകാശനവും നടക്കും. വിഴിഞ്ഞത്തെ കേന്ദ്രീകരിച്ച് തുറമുഖം, വ്യവസായം, ലോജിസ്റ്റിക്സ്, നഗരവികസനം എന്നിവയെ പരസ്പരം ബന്ധിപ്പിക്കുന്ന വിപുലമായ സാമ്പത്തിക ശൃംഖല സൃഷ്ടിക്കുകയാണ് പദ്ധതിയുടെ ലക്ഷ്യം.
ഇന്ത്യയിലെ ആദ്യ ആഴക്കടൽ ട്രാൻസ്ഷിപ്മെന്റ് തുറമുഖമായ വിഴിഞ്ഞം ഇതോടെ ട്രാൻസ്ഷിപ്മെന്റ് കേന്ദ്രം എന്ന നിലയിൽ നിന്ന് നേരിട്ടുള്ള അന്താരാഷ്ട്ര കയറ്റുമതി-ഇറക്കുമതി കവാടമെന്ന പുതിയ ഘട്ടത്തിലേക്ക് കടക്കുകയാണ്. അന്താരാഷ്ട്ര കപ്പൽപാതയ്ക്ക് വളരെ അടുത്തുള്ള വിഴിഞ്ഞത്തിന്റെ തന്ത്രപ്രധാനമായ ഭൂമിശാസ്ത്ര സ്ഥാനം കേരളത്തിനും രാജ്യത്തിനും വലിയ നേട്ടമായി മാറുമെന്നാണ് പ്രതീക്ഷ.
സ്പെയിനിലെ വലൻസിയയിലേക്ക് അയച്ച ആദ്യ കയറ്റുമതി കണ്ടെയ്നറിന്റെ ട്രയൽ റൺ വിജയകരമായി പൂർത്തിയാക്കിയതിന് പിന്നാലെയാണ് പൂർണ EXIM പ്രവർത്തനങ്ങൾക്ക് തുടക്കമാകുന്നത്. ഇനി കൊളംബോ, സിംഗപ്പൂർ, ദുബൈ തുടങ്ങിയ ഇടത്താവളങ്ങൾ വഴി ചരക്ക് കൈമാറേണ്ട സാഹചര്യം കുറച്ച്, വിഴിഞ്ഞം വഴി നേരിട്ട് വിദേശ വിപണികളിലേക്ക് ചരക്കുകൾ എത്തിക്കാനുള്ള അവസരമാണ് ഒരുങ്ങുന്നത്.
ഇത് കേരളത്തിലെ ചെറുകിട-ഇടത്തരം വ്യവസായങ്ങൾക്ക് പ്രത്യേകിച്ച് വലിയ അവസരമാകും. കാർഷികോത്പന്നങ്ങൾ, സുഗന്ധവ്യഞ്ജനങ്ങൾ, കശുവണ്ടി, സമുദ്രോത്പന്നങ്ങൾ, കൈത്തറി, തുണിത്തരങ്ങൾ തുടങ്ങി കേരളത്തിന്റെ പരമ്പരാഗത കയറ്റുമതി മേഖലകൾക്ക് യൂറോപ്പ്, അമേരിക്ക തുടങ്ങിയ വിപണികളിലേക്ക് കൂടുതൽ കാര്യക്ഷമമായി പ്രവേശിക്കാനാകും.
നേരിട്ടുള്ള കയറ്റുമതി സൗകര്യം ചരക്കുനീക്ക സമയവും ലോജിസ്റ്റിക്സ് ചെലവും കുറയ്ക്കാൻ സഹായിക്കുമെന്നാണ് വിലയിരുത്തൽ. അതോടൊപ്പം വെയർഹൗസിംഗ്, കോൾഡ് സ്റ്റോറേജ്, കണ്ടെയ്നർ ഫ്രൈറ്റ് സ്റ്റേഷനുകൾ, ലോജിസ്റ്റിക്സ് പാർക്കുകൾ തുടങ്ങിയ അനുബന്ധ മേഖലകളിലും വലിയ വളർച്ചയ്ക്ക് സാധ്യതയുണ്ട്.
വിഴിഞ്ഞത്തിന്റെ വളർച്ച തിരുവനന്തപുരം ഉൾപ്പെടെയുള്ള തെക്കൻ കേരളത്തിന്റെ വ്യവസായ-വാണിജ്യ മേഖലയിലും പുതിയ നിക്ഷേപങ്ങൾക്ക് വഴിതുറക്കുമെന്നാണ് പ്രതീക്ഷ. നേരിട്ടും പരോക്ഷമായും നിരവധി തൊഴിലവസരങ്ങൾ സൃഷ്ടിക്കപ്പെടുന്നതിനൊപ്പം കസ്റ്റംസ് ഡ്യൂട്ടി, ജിഎസ്ടി, പോർട്ട് ചാർജുകൾ തുടങ്ങിയവയിലൂടെ സർക്കാർ വരുമാനത്തിലും വർധനയുണ്ടാകുമെന്നാണ് വിലയിരുത്തൽ.
തുറമുഖത്തിന്റെ രണ്ടാം ഘട്ട വികസനവും പുരോഗമിക്കുന്ന സാഹചര്യത്തിൽ, വിഴിഞ്ഞത്തെ കേന്ദ്രീകരിച്ച് വിപുലമായ മാരിടൈം ഇക്കണോമിക് റീജിയൻ രൂപപ്പെടുത്താനുള്ള സാധ്യതകളിലേക്കാണ് പുതിയ EXIM പ്രവർത്തനങ്ങൾ വിരൽചൂണ്ടുന്നത്. തുറമുഖത്തോട് ചേർന്നുള്ള വ്യവസായ-ലോജിസ്റ്റിക്സ് ശൃംഖല ശക്തിപ്പെടുത്തുന്നതിലൂടെ വിഴിഞ്ഞത്തെ കേരളത്തിന്റെ പ്രധാന സാമ്പത്തിക വളർച്ചാകേന്ദ്രമാക്കി മാറ്റുകയാണ് ലക്ഷ്യം.
അങ്ങനെ, കപ്പലുകൾക്ക് ചരക്ക് മാറ്റിവയ്ക്കുന്ന ഒരു ട്രാൻസ്ഷിപ്മെന്റ് കേന്ദ്രം എന്നതിലുപരി കേരളത്തിൽ നിന്ന് ലോകവിപണിയിലേക്ക് നേരിട്ട് ചരക്ക് എത്തിക്കുന്ന വാണിജ്യ കവാടം എന്ന പുതിയ പദവിയിലേക്കാണ് വിഴിഞ്ഞം ഇന്ന് ചുവടുവയ്ക്കുന്നത്.
