ഭുവനേശ്വര്‍: ഒഡീഷയിലെ ഒരു സര്‍ക്കാര്‍ ആശുപത്രിയില്‍ നിന്ന് സൗജന്യമായിചികിത്സ ലഭിച്ച അനുഭവം പങ്കുവെച്ച് അമേരിക്കന്‍ വിനോദസഞ്ചാരി. മൈക്ക് എന്ന അമേരിക്കന്‍ സഞ്ചാരിയാണ് ഇന്ത്യയിലെ ആരോഗ്യസംവിധാനത്തെക്കുറിച്ചുള്ള തന്റെ അനുഭവം ഇന്‍സ്റ്റഗ്രാം വീഡിയോയിലൂടെ പങ്കുവെച്ചത്. ‘American Hospitalized in India’ എന്ന പേരിലാണ് വീഡിയോ പോസ്റ്റ് ചെയ്തത്.
ഇന്ത്യയിലെത്തിയ അഞ്ചാം ദിവസമാണ് മൈക്കിന് ശാരീരിക അസ്വസ്ഥതകള്‍ അനുഭവപ്പെട്ടത്. ഒഡീഷയിലൂടെ യാത്ര ചെയ്യുന്നതിനിടെ രുചികരമായ ഭക്ഷണം അമിതമായി കഴിച്ചതിനെ തുടര്‍ന്നാണ് അസ്വസ്ഥതയുണ്ടായതെന്നാണ് മൈക്ക് പറയുന്നത്. തുടര്‍ന്ന് 12 മണിക്കൂറിലേറെ തുടര്‍ച്ചയായി ഛര്‍ദ്ദിച്ചതോടെ ആശുപത്രിയില്‍ പ്രവേശിപ്പിക്കുകയായിരുന്നു.
ഇത് ഭക്ഷ്യവിഷബാധയല്ലെന്നും രുചികരമായ ഭക്ഷണം അമിതമായി കഴിച്ചതാണ് പ്രശ്നത്തിന് കാരണമെന്നും മൈക്ക് വീഡിയോയില്‍ വ്യക്തമാക്കുന്നുണ്ട്. ആശുപത്രിയില്‍ പ്രവേശിപ്പിച്ച ശേഷം ഐ.വി ഫ്ലൂയിഡുകളും ഛര്‍ദ്ദി നിയന്ത്രിക്കാനുള്ള മരുന്നുകളും ഇന്‍ജക്ഷനുകളും നല്‍കിയെന്നും അദ്ദേഹം പറഞ്ഞു.
അമേരിക്കയിലെ ചികിത്സാ ചെലവുകളുമായി ഇന്ത്യയിലെ അനുഭവത്തെ താരതമ്യം ചെയ്തുകൊണ്ടാണ് മൈക്ക് വീഡിയോയില്‍ സംസാരിക്കുന്നത്. അമേരിക്കയില്‍ ഇതേ ചികിത്സയ്‌ക്ക് ഐ.വി ഫ്ളൂയിഡിനും മരുന്നുകള്‍ക്കുമായി ആയിരക്കണക്കിന് ഡോളര്‍ ചെലവാകുമായിരുന്നുവെന്ന് അദ്ദേഹം പറഞ്ഞു. എന്നാല്‍ ഒഡീഷയിലെ സര്‍ക്കാര്‍ ആശുപത്രിയില്‍ നിന്ന് ഒരു രൂപ പോലും ഈടാക്കാതെ ചികിത്സ ലഭിച്ചതായും മൈക്ക് വ്യക്തമാക്കി. ‘ഈ സോഷ്യലിസ്റ്റുകള്‍ എന്നോട് ഒരു സെന്റ് പോലും ഈടാക്കിയില്ല’ എന്നായിരുന്നു അദ്ദേഹത്തിന്റെ പരാമര്‍ശം.
View this post on Instagram
‘ഇപ്പോള്‍ 100 ശതമാനം സുഖമായിരിക്കുന്നു’ എന്ന അടിക്കുറിപ്പോടെയാണ് മൈക്ക് വീഡിയോ പങ്കുവെച്ചിരിക്കുന്നത്. മൈക്കിന്റെ അനുഭവക്കുറിപ്പ് സോഷ്യല്‍ മീഡിയയില്‍ ശ്രദ്ധ നേടിയതോടെ നിരവധി പേരാണ് പ്രതികരണങ്ങളുമായി എത്തിയത്. സൗജന്യ ചികിത്സ ലഭ്യമാകുന്നതിന്റെ പ്രാധാന്യം ചൂണ്ടിക്കാട്ടിയായിരുന്നു പലരുടെയും പ്രതികരണം.
ഇന്ത്യന്‍ ഭക്ഷണവുമായി പൊരുത്തപ്പെടാന്‍ യാത്രക്കാര്‍ ആദ്യ ദിവസങ്ങളില്‍ പഴങ്ങളും തൈരും ഉള്‍പ്പെടെയുള്ള ലളിതമായ ഭക്ഷണങ്ങള്‍ തിരഞ്ഞെടുക്കണമെന്നും എരിവ് കുറഞ്ഞ ഭക്ഷണം കഴിക്കണമെന്നും ചിലര്‍ നിര്‍ദേശിച്ചു. ഇന്ത്യയിലെത്തുന്ന വിദേശ സഞ്ചാരികളുടെ ഭക്ഷണരീതിയുമായി ബന്ധപ്പെട്ടും പോസ്റ്റിന് താഴെ ചര്‍ച്ചകള്‍ നടന്നു.
