മൊഗാദിഷു: തുര്ക്കി സൈന്യത്തിനായി ആയുധങ്ങളും സൈനിക ഉപകരണങ്ങളുമായി പോയ ചരക്ക് കപ്പല് സോമാലിയന് കടല്ക്കൊള്ളക്കാര് റാഞ്ചി. കാമറൂണ് പതാകയുള്ള ‘എം.വി ലുതുഫ്’ എന്ന ചരക്ക് കപ്പലാണ് സോമാലിയന് തീരത്തിന് സമീപം കടല്ക്കൊള്ളക്കാരുടെ പിടിയിലായത്. കപ്പലിലുണ്ടായിരുന്ന പത്ത് ജീവനക്കാരില് ആറ് പേരും ഇന്ത്യക്കാരാണെന്ന് സോമാലിയന് അധികൃതര് അറിയിച്ചു.
പന്ഡ്ലാന്ഡിലെ ഐല് ജില്ലയിലുള്ള മരയ്യ തീരത്തുനിന്ന് ഏകദേശം മൂന്നര നോട്ടിക്കല് മൈല് അകലെയാണ് കപ്പല് റാഞ്ചിയത്. കപ്പലിലുണ്ടായിരുന്നവരില് ആറ് ഇന്ത്യക്കാര്ക്ക് പുറമെ ഒരു തുര്ക്കി പൗരനും ഒരു ജോര്ജിയന് പൗരനും രണ്ട് സെര്ബിയന് സുരക്ഷാ ഗാര്ഡുകളുമുണ്ട്.
കപ്പലില് തുര്ക്കിയിലെ സൈനിക പരിശീലന കേന്ദ്രത്തിലേക്ക് കൊണ്ടുപോകുകയായിരുന്ന ആയുധങ്ങള്ക്കൊപ്പം വിവിധ വാര്ത്താവിനിമയ, സാറ്റലൈറ്റ് ഉപകരണങ്ങളും ഉണ്ടായിരുന്നുവെന്നാണ് വിവരം. മൊഗാദിഷുവിലെ തുര്ക്കി സൈനിക പരിശീലന കേന്ദ്രത്തിലേക്കായിരുന്നു ചരക്ക് എത്തിക്കേണ്ടിയിരുന്നത്.
കഴിഞ്ഞ ഏപ്രില് 26ന് ‘എം.വി സ്വാര്ഡ്’ എന്ന കപ്പല് റാഞ്ചിയ സംഘത്തില്പ്പെട്ട കടല്ക്കൊള്ളക്കാരാണ് ‘എം.വി ലുതുഫി’നെയും റാഞ്ചിയതെന്നാണ് പുറത്തുവരുന്ന റിപ്പോര്ട്ടുകള്. കപ്പല് ഇപ്പോള് പന്ഡ്ലാന്ഡിലെ ദംഗോരോയോ ജില്ലയിലെ ഗാര്മാല് തീരത്ത് എത്തിച്ചതായാണ് വിവരം.
കപ്പല് റാഞ്ചിയതോടെ പ്രദേശത്ത് സുരക്ഷാ നിരീക്ഷണവും ശക്തമാക്കിയിട്ടുണ്ട്. തുര്ക്കി സൈന്യത്തിന്റെ ഹെലികോപ്റ്ററുകളും ഡ്രോണുകളും മേഖലയില് നിരീക്ഷണം നടത്തുന്നുണ്ട്.
പോളാര് മൂവ്മെന്റ് ഷിപ്പിങ്ങിന്റെ ഉടമസ്ഥതയിലുള്ളതാണ് ‘എം.വി ലുതുഫ്’. തുര്ക്കി സൈന്യത്തിനുള്ള ആയുധങ്ങളുമായി സഞ്ചരിച്ചിരുന്ന കപ്പല് സോമാലിയന് കടല്ക്കൊള്ളക്കാരുടെ പിടിയിലായതോടെ ചരക്കിന്റെ സുരക്ഷയ്ക്കൊപ്പം കപ്പലിലുള്ള ആറ് ഇന്ത്യന് ജീവനക്കാരുടെ സുരക്ഷയും നിര്ണായകമായിരിക്കുകയാണ്.
