മ്യൂണിക്: മത്സരത്തിനിടെ തുടര്ച്ചയായ രണ്ടാം തവണയും കുഴഞ്ഞുവീണതിന് പിന്നാലെ ആരോഗ്യസ്ഥിതിയെക്കുറിച്ച് വിശദീകരിച്ച് ബയേണ് മ്യൂണിക്കിന്റെ യുവതാരം ജമാല് മുസിയാല. ‘ന്യൂറോളജിക്കല് ഡിസ്ഫങ്ഷന്’ മൂലമുണ്ടാകുന്ന താല്ക്കാലികവും ഹ്രസ്വകാലത്തേക്കുള്ളതുമായ അബ്സന്സ് സീസറുകളാണ് തനിക്ക് സംഭവിക്കുന്നതെന്ന് 23കാരനായ മുസിയാല വ്യക്തമാക്കി. ചികിത്സയിലൂടെ നിയന്ത്രിക്കാവുന്ന അവസ്ഥയാണെന്നും താരം പറഞ്ഞു.
ചൊവ്വാഴ്ച ഹൈഡന്ഹൈമിനെതിരായ സൗഹൃദ മത്സരത്തില് ബെഞ്ചില്നിന്ന് ഇറങ്ങി ആറ് മിനിറ്റിന് ശേഷമാണ് മുസിയാല കുഴഞ്ഞുവീണത്. ബോധം നഷ്ടപ്പെട്ടതുപോലെ കാണപ്പെട്ട താരത്തിന് മെഡിക്കല് സംഘത്തിന്റെ സഹായം ലഭിക്കുകയും തുടര്ന്ന് ഗ്രൗണ്ടില്നിന്ന് മാറ്റുകയും ചെയ്തു. മത്സരത്തില് ബയേണ് 4-2ന് വിജയിച്ചു. ഇതിന് നാല് ദിവസം മുമ്പ് ആര്ബി ലെപ്സിഗിനെതിരായ സൗഹൃദ മത്സരത്തിലും മുസിയാല സമാനമായി കുഴഞ്ഞുവീണിരുന്നു. അന്ന് ബയേണ് 3-1ന് വിജയിച്ചിരുന്നു.
തന്റെ ആരോഗ്യസ്ഥിതിയെക്കുറിച്ച് ഇന്സ്റ്റഗ്രാമിലൂടെയാണ് മുസിയാല വിശദീകരിച്ചത്. ന്യൂറോളജിക്കല് പ്രശ്നത്തെ തുടര്ന്നുള്ള താല്ക്കാലിക അബ്സന്സ് സീസറുകളാണ് സംഭവങ്ങള്ക്ക് കാരണമെന്നും മികച്ച ചികിത്സ ലഭിക്കുന്നുണ്ടെന്നും താരം പറഞ്ഞു. ഇത്തരം സംഭവങ്ങള് ആദ്യ കാഴ്ചയില് ഭയപ്പെടുത്തുന്നതായി തോന്നാമെങ്കിലും നിലവില് അത് തന്റെ ദൈനംദിന ജീവിതത്തിന്റെ ഭാഗമാണെന്നും മുസിയാല വ്യക്തമാക്കി. മികച്ച വൈദ്യചികിത്സ ലഭിക്കുന്നുണ്ടെന്നും താന് ശുഭാപ്തിവിശ്വാസത്തിലാണെന്നും താരം കൂട്ടിച്ചേര്ത്തു.
ബയേണ് മ്യൂണിക്കും കുടുംബവും സുഹൃത്തുക്കളും ഈ ഘട്ടത്തില് തനിക്കൊപ്പം ശക്തമായ പിന്തുണയുമായി ഉണ്ടെന്നും മുസിയാല പറഞ്ഞു. ചൊവ്വാഴ്ചത്തെ മത്സരത്തിന് ശേഷം ബയേണ് സ്പോര്ടിങ് ഡയറക്ടര് മാക്സ് എബര്ല് മുസിയാലയുടെ ആരോഗ്യസ്ഥിതിയെക്കുറിച്ച് പ്രതികരിച്ചിരുന്നു. താരത്തിന്റെ അവസ്ഥയെക്കുറിച്ച് ക്ലബ്ബിന് നേരത്തെ തന്നെ അറിയാമായിരുന്നുവെന്നും സാഹചര്യം സംബന്ധിച്ച് ബോധവാന്മാരാണെന്നും അദ്ദേഹം വ്യക്തമാക്കി.
2025ലെ ക്ലബ് ലോകകപ്പിനിടെ കണങ്കാലിന് പരിക്കേറ്റതിനെ തുടര്ന്ന് കഴിഞ്ഞ സീസണിലെ ആദ്യ ആറ് മാസത്തോളം മുസിയാലയ്ക്ക് കളിക്കാനായിരുന്നില്ല. പിന്നീട് തിരിച്ചെത്തിയ താരം സീസണിന്റെ രണ്ടാം പകുതിയില് കളത്തിലിറങ്ങി. 2026 ലോകകപ്പില് ജര്മനിയുടെ നാല് മത്സരങ്ങളില് മൂന്നിലും താരം ആദ്യ ഇലവനില് ഇടം നേടിയിരുന്നു.
