തൃശൂരിന് തകര്‍പ്പന്‍ തുടക്കം; കാലിക്കറ്റിനെ വീഴ്‌ത്തി ടൈറ്റന്‍സ്, നിഖില്‍ തോട്ടത്തിന് അര്‍ധസെഞ്ചുറി തിളക്കം

തിരുവനന്തപുരം: കേരള ക്രിക്കറ്റ് ലീഗിന്റെ മൂന്നാം സീസണിന് വിജയത്തുടക്കമിട്ട് തൃശൂര്‍ ടൈറ്റന്‍സ്. ഉദ്ഘാടന മത്സരത്തില്‍ കാലിക്കറ്റ് ഗ്ലോബ് സ്റ്റാര്‍സിനെ ഏഴ് വിക്കറ്റിന് തോല്‍പ്പിച്ചാണ് തൃശൂര്‍ ടൈറ്റന്‍സ് സീസണിലെ ആദ്യ ജയം സ്വന്തമാക്കിയത്. ആദ്യം ബാറ്റ് ചെയ്ത കാലിക്കറ്റ് 20 ഓവറില്‍ എട്ട് വിക്കറ്റ് നഷ്ടത്തില്‍ 137 റണ്‍സെടുത്തപ്പോള്‍, 16.5 ഓവറില്‍ മൂന്ന് വിക്കറ്റ് മാത്രം നഷ്ടപ്പെടുത്തി തൃശൂര്‍ ലക്ഷ്യം മറികടന്നു. 48 പന്തില്‍ പുറത്താകാതെ 59 റണ്‍സെടുത്ത നിഖില്‍ തോട്ടത്താണ് കളിയിലെ താരം.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ കാലിക്കറ്റ് ഗ്ലോബ് സ്റ്റാര്‍സിന് ഇന്നിങ്സിലെ രണ്ടാം പന്തില്‍ തന്നെ വരുണ്‍ നായനാരെ നഷ്ടമായി. ആനന്ദ് ജോസഫിന്റെ പന്തില്‍ നിഖില്‍ തോട്ടത്ത് ക്യാച്ചെടുത്താണ് വരുണിനെ പുറത്താക്കിയത്. തുടര്‍ന്ന് രോഹന്‍ കുന്നുമ്മലും കെ.എസ്. അരവിന്ദും ചേര്‍ന്ന് ഇന്നിങ്സ് കെട്ടിപ്പടുത്തു. ഇരുവരും രണ്ടാം വിക്കറ്റില്‍ 55 റണ്‍സ് കൂട്ടിച്ചേര്‍ത്തു. എന്നാല്‍ ഇരുവരെയും പുറത്താക്കി ബിജു നാരായണന്‍ കാലിക്കറ്റിന്റെ മുന്നേറ്റത്തിന് തടയിട്ടു. രോഹന്‍ 30 റണ്‍സും അരവിന്ദ് 26 റണ്‍സുമെടുത്തു.

അഖില്‍ സ്‌കറിയ (9), അശ്വിന്‍ ആനന്ദ് (2) എന്നിവര്‍ വേഗത്തില്‍ മടങ്ങിയതോടെ കാലിക്കറ്റ് സമ്മര്‍ദ്ദത്തിലായി. സല്‍മാന്‍ നിസാര്‍ 13 റണ്‍സെടുത്ത് പുറത്തായി. എന്നാല്‍ അവസാന ഓവറുകളില്‍ കൃഷ്ണദേവന്‍ നടത്തിയ വെടിക്കെട്ടാണ് കാലിക്കറ്റിനെ മാന്യമായ സ്‌കോറിലെത്തിച്ചത്. 15 പന്തില്‍ മൂന്ന് ഫോറും രണ്ട് സിക്സും സഹിതം 27 റണ്‍സാണ് കൃഷ്ണദേവന്‍ നേടിയത്. അബ്ദുള്‍ ബാസിത് 18 റണ്‍സെടുത്തു. തൃശൂരിനായി ആനന്ദ് ജോസഫും ബിജു നാരായണനും രണ്ട് വിക്കറ്റ് വീതം വീഴ്‌ത്തി.

138 റണ്‍സ് വിജയലക്ഷ്യവുമായി ഇറങ്ങിയ തൃശൂരിനും തുടക്കം പ്രതീക്ഷിച്ചപോലെ ആയിരുന്നില്ല. കെ.ആര്‍. രോഹിതിനെ മൂന്ന് റണ്‍സിനും അഹ്‌മദ് ഇമ്രാനെ 10 റണ്‍സിനും അഖിന്‍ സത്താര്‍ പുറത്താക്കി. പിന്നീട് ഷോണ്‍ റോജറും നിഖില്‍ തോട്ടത്തും ചേര്‍ന്ന് 42 റണ്‍സ് കൂട്ടുകെട്ടുണ്ടാക്കി തൃശൂരിനെ മത്സരത്തിലേക്ക് തിരിച്ചുകൊണ്ടുവന്നു. ഷോണ്‍ റോജര്‍ 30 റണ്‍സെടുത്ത് മടങ്ങിയെങ്കിലും നിഖില്‍ ഒരറ്റത്ത് ഉറച്ചുനിന്നു. ക്യാപ്റ്റന്‍ എം.എസ്. അഖിലിനൊപ്പം ചേര്‍ന്ന് നിഖില്‍ തൃശൂരിന്റെ വിജയമുറപ്പിച്ചു. 4

8 പന്തില്‍ 59 റണ്‍സുമായി പുറത്താകാതെ നിന്ന നിഖില്‍ ടീമിന്റെ വിജയത്തില്‍ നിര്‍ണായക പങ്കുവഹിച്ചു. അഖില്‍ 27 റണ്‍സെടുത്ത് മികച്ച പിന്തുണ നല്‍കി. ഒടുവില്‍ 19 പന്തുകള്‍ ബാക്കിനില്‍ക്കെ മൂന്ന് വിക്കറ്റ് നഷ്ടത്തില്‍ തൃശൂര്‍ ടൈറ്റന്‍സ് വിജയത്തിലെത്തി. കേരള ക്രിക്കറ്റ് ലീഗിന്റെ മൂന്നാം സീസണില്‍ ആദ്യ മത്സരത്തില്‍ തന്നെ തകര്‍പ്പന്‍ പ്രകടനവുമായി ടൈറ്റന്‍സ് വരവറിയിച്ചു.