ന്യൂഡല്‍ഹി: നിരവധി കുറ്റകൃത്യങ്ങളില്‍ പ്രതികളായ മൂന്ന് പിടികിട്ടാപ്പുള്ളികളെ മലേഷ്യയില്‍ നിന്ന് ഇന്ത്യയിലെത്തിച്ചതായി കേന്ദ്ര ആഭ്യന്തര മന്ത്രി അമിത് ഷാ. ബംബിഹ ഗ്യാങുമായി ബന്ധമുള്ള ജസ്പ്രീത് സിങ്, അജയ് സിങ്, പവന്‍ദീപ് സിങ് എന്നിവരെയാണ് ഇന്ത്യന്‍ ഏജന്‍സികള്‍ പിടികൂടി രാജ്യത്ത് എത്തിച്ചത്. കൊള്ളപ്പിരിവ്, അതിര്‍ത്തി കടന്നുള്ള ആയുധക്കടത്ത്, മയക്കുമരുന്ന് കടത്ത്, ലുധിയാനയില്‍ ഗ്രനേഡ് ആക്രമണത്തിന് ശ്രമം തുടങ്ങിയ കേസുകളിലാണ് ഇവര്‍ അന്വേഷണ ഏജന്‍സികള്‍ക്ക് വേണ്ടിയിരുന്നത്.
ഇന്ത്യയിലെത്തിച്ച മൂന്ന് പേരെയും പൊലീസ് കസ്റ്റഡിയില്‍ വിട്ടതായും അമിത് ഷായുടെ ഓഫീസ് എക്സില്‍ അറിയിച്ചു. പ്രധാനമന്ത്രി നരേന്ദ്ര മോദിയുടെ സുരക്ഷിത ഇന്ത്യ എന്ന ലക്ഷ്യത്തിന്റെ ഭാഗമായി 2026ല്‍ മാത്രം 51 കൊടുംകുറ്റവാളികളെ വിദേശരാജ്യങ്ങളില്‍ നിന്ന് ഇന്ത്യയിലെത്തിക്കാന്‍ അന്വേഷണ ഏജന്‍സികള്‍ക്ക് കഴിഞ്ഞതായി അമിത് ഷാ വ്യക്തമാക്കി. വിദേശരാജ്യങ്ങളില്‍ ഒളിവില്‍ കഴിയുന്ന കുറ്റവാളികളെ കണ്ടെത്തി നിയമനടപടികള്‍ക്ക് വിധേയരാക്കുന്നതിനുള്ള കേന്ദ്ര ഏജന്‍സികളുടെ നീക്കങ്ങള്‍ ശക്തമാക്കിയതിന്റെ ഭാഗമായാണ് പുതിയ നടപടി.
നേരത്തെ മെയ് മാസത്തില്‍ യുഎഇയില്‍ നിന്ന് രണ്ട് പിടികിട്ടാപ്പുള്ളികളെയും ഇന്ത്യന്‍ ഏജന്‍സികള്‍ രാജ്യത്ത് എത്തിച്ചിരുന്നു. സിബിഐ, വിദേശകാര്യ മന്ത്രാലയം, ആഭ്യന്തര മന്ത്രാലയം എന്നിവയുടെ ഏകോപനത്തോടെയായിരുന്നു നടപടി. വന്‍ സാമ്പത്തിക തട്ടിപ്പ് കേസില്‍ പ്രതിയായ കമലേഷ് പരേഖിനെയും വ്യാജരേഖകള്‍ ഉപയോഗിച്ച് പാസ്പോര്‍ട്ട് നേടുന്ന സംഘവുമായി ബന്ധപ്പെട്ട കേസില്‍ ഹരിയാന പൊലീസിന് വേണ്ടിയിരുന്ന ആലോക് കുമാര്‍ എന്ന യശ്പാല്‍ സിങ്ങിനെയുമാണ് മെയ് ഒന്നിന് യുഎഇയില്‍ നിന്ന് ഇന്ത്യയിലെത്തിച്ചത്.
ഇന്റര്‍പോള്‍ റെഡ് നോട്ടീസ് ഉള്‍പ്പെടെയുള്ള നടപടികളിലൂടെയാണ് കമലേഷ് പരേഖിനെ യുഎഇയില്‍ കണ്ടെത്തിയത്. ആലോക് കുമാറിനെതിരെ വഞ്ചന, വ്യാജരേഖ നിര്‍മാണം, ക്രിമിനല്‍ ഗൂഢാലോചന തുടങ്ങിയ കുറ്റങ്ങളാണ് ചുമത്തിയിരുന്നത്.
