കൊളംബോ: ശ്രീലങ്കയ്ക്കെതിരായ രണ്ടാം ടെസ്റ്റില് നേടിയ തകര്പ്പന് സെഞ്ചുറിയുടെ ആഘോഷം കുടുംബത്തിന്റെ പാരമ്പര്യത്തിന് സമര്പ്പിച്ച് ഇന്ത്യന് വിക്കറ്റ് കീപ്പര് ബാറ്റര് ധ്രുവ് ജുറെല്. സെഞ്ചുറി പൂര്ത്തിയാക്കിയ ശേഷം സല്യൂട്ട് ചെയ്യുകയും കൈയിലെ മസില് ഉയര്ത്തിക്കാട്ടുകയും ചെയ്ത ജുറെല്, തന്റെ ബൈസെപ്പില് പച്ചകുത്തിയിരിക്കുന്ന ‘ജയ് ജവാന്, ജയ് കിസാന്’ എന്ന വാചകവും കുടുംബവേരുകളെ ഓര്മിപ്പിക്കുന്നതാണെന്ന് പറഞ്ഞു.
”എന്റെ മുത്തച്ഛന് കര്ഷകനായിരുന്നു, അച്ഛന് സൈനികനും. അതാണ് എന്റെ വേരുകള്. അവരെ ഒരിക്കലും മറക്കാന് ഞാന് ആഗ്രഹിക്കുന്നില്ല. അതുകൊണ്ടാണ് ആ സല്യൂട്ട് അച്ഛനും മുത്തച്ഛനും സമര്പ്പിച്ചത്,” ജുറെല് മത്സരശേഷം പറഞ്ഞു. ശ്രീലങ്കയ്ക്കെതിരായ രണ്ടാം ടെസ്റ്റിന്റെ രണ്ടാം ദിനത്തില് പുറത്താകാതെ 115 റണ്സാണ് ജുറെല് നേടിയത്. ഇതോടെ ഇന്ത്യ 9 വിക്കറ്റ് നഷ്ടത്തില് 503 റണ്സിന് ഒന്നാം ഇന്നിങ്സ് ഡിക്ലയര് ചെയ്തു. 177 പന്തില് ഒമ്പത് ഫോറും രണ്ട് സിക്സും ഉള്പ്പെടുന്നതായിരുന്നു ജുറെലിന്റെ ഇന്നിങ്സ്.
“जय जवान, जय किसान”
🗣️ My grandfather was a farmer and my father, a soldier.🫡
Dhruv Jurel reveals the reason behind the special celebration and the tattoo on his arm after reaching his 💯 👌#TeamIndia | #SLvIND | @dhruvjurel21 pic.twitter.com/pQlM1r84hN
— BCCI (@BCCI) August 24, 2026
റിഷഭ് പന്തിനൊപ്പം ഏഴാം വിക്കറ്റില് ജുറെല് 112 റണ്സിന്റെ കൂട്ടുകെട്ടാണ് പടുത്തുയര്ത്തിയത്. പന്ത് 63 റണ്സെടുത്ത് പുറത്തായപ്പോഴും ജുറെല് തന്റെ സ്വാഭാവിക ശൈലിയില് ബാറ്റിങ് തുടര്ന്നു. ”പന്ത് മികച്ച താരമാണ്. ഓസ്ട്രേലിയയിലും ഇംഗ്ലണ്ടിലും ഇന്ത്യയ്ക്കായി അദ്ദേഹം ചെയ്ത കാര്യങ്ങള് നമുക്കെല്ലാം അറിയാം. അതുകൊണ്ട് അദ്ദേഹം ക്രീസിലുണ്ടാകുമ്പോഴെല്ലാം ഞാന് ഉപദേശം തേടാറുണ്ട്,” ജുറെല് പറഞ്ഞു.
പന്തിന്റെ ആക്രമണാത്മക ശൈലി അനുകരിക്കാന് ശ്രമിക്കാറില്ലെന്നും ജുറെല് വ്യക്തമാക്കി. ഏത് ബൗളറെ ആക്രമിക്കണം, ഏത് സ്പെല് എങ്ങനെ നേരിടണം തുടങ്ങിയ കാര്യങ്ങളിലാണ് താന് കൂടുതല് ശ്രദ്ധിക്കുന്നതെന്നും അദ്ദേഹം പറഞ്ഞു. സെഞ്ചുറിയിലേക്ക് നീങ്ങുന്നതിനിടെ മുഹമ്മദ് സിറാജ് നല്കിയ പിന്തുണയും ജുറെല് പ്രത്യേകം പരാമര്ശിച്ചു. 29 പന്തുകള് നേരിട്ട സിറാജ് ജുറെലിന് ആവശ്യമായ സമയം നല്കി. കൊളംബോയില് നേടിയ സെഞ്ചുറി ജുറെലിന്റെ കരിയറിലെ രണ്ടാം ടെസ്റ്റ് സെഞ്ചുറിയാണ്.
