ലക്നൗ: സർക്കാർ ആരോഗ്യ സംവിധാനത്തെ കൂടുതൽ ശക്തിപ്പെടുത്താൻ നിർണായക നീക്കവുമായി ഉത്തർപ്രദേശ് സർക്കാർ. സംസ്ഥാനത്തെ സർക്കാർ ഡോക്ടർമാർക്ക് 70 വയസുവരെ സേവനം തുടരാൻ അവസരം നൽകും.
നിലവിൽ സർക്കാർ ഡോക്ടർമാരുടെ വിരമിക്കൽ പ്രായം 65 വയസാണ്. ഉത്തർപ്രദേശ് ഉപമുഖ്യമന്ത്രിയും ആരോഗ്യവകുപ്പ് മന്ത്രിയുമായ ബ്രജേഷ് പഥക് ആണ് ഇക്കാര്യം അറിയിച്ചത്. യോഗ്യരായ ഡോക്ടർമാർക്ക് വിരമിച്ച ശേഷം 70 വയസുവരെ പുനർനിയമനം നൽകാനുള്ള നടപടികൾ ആരോഗ്യവകുപ്പ് ആരംഭിച്ചതായും അദ്ദേഹം പറഞ്ഞു.
ആരോഗ്യ മേഖലയിലെ പരിചയസമ്പന്നരായ ഡോക്ടർമാരുടെ സേവനവും വൈദഗ്ധ്യവും കൂടുതൽ പ്രയോജനപ്പെടുത്തുകയാണ് തീരുമാനത്തിന്റെ ലക്ഷ്യം. ആരോഗ്യ സേവനങ്ങളുടെ ഗുണനിലവാരം മെച്ചപ്പെടുത്തുന്നതിനും സർക്കാർ ആശുപത്രികളിലെ ഡോക്ടർമാരുടെ ലഭ്യത ഉറപ്പാക്കുന്നതിനും ഇത് സഹായിക്കുമെന്നാണ് സർക്കാർ വിലയിരുത്തൽ. നിലവിലുള്ള സർക്കാർ വ്യവസ്ഥകൾക്കും പുനർനിയമന നടപടിക്രമങ്ങൾക്കും വിധേയമായിട്ടായിരിക്കും ഡോക്ടർമാർക്ക് 70 വയസുവരെ സേവനം തുടരാനുള്ള അവസരം ലഭിക്കുക.
