കോട്ടയം: ബന്ധുക്കൾക്കൊപ്പം കോട്ടയം മെഡിക്കൽ കോളജ് ഹോസ്റ്റലിലെത്തിയതിന് പിന്നാലെ കാണാതായ 21കാരിയെ എറണാകുളത്ത് കണ്ടെത്തി. എറണാകുളം മേത്തല സ്വദേശിനിയായ യുവതിയെയാണ് ഗാന്ധിനഗർ പൊലീസ് നടത്തിയ അന്വേഷണത്തിനൊടുവിൽ കണ്ടെത്തിയത്.
കോട്ടയം മെഡിക്കൽ കോളജിൽ എംബിബിഎസിന് പ്രവേശനം ലഭിച്ചെന്നും അഡ്മിഷൻ നടപടികൾ പൂർത്തിയായതിനാൽ ഹോസ്റ്റലിൽ എത്തി താമസം ആരംഭിക്കണമെന്നുമാണ് യുവതി വീട്ടുകാരോട് പറഞ്ഞിരുന്നത്. ഇതിന്റെ അടിസ്ഥാനത്തിൽ ബുധനാഴ്ച ബന്ധുക്കൾക്കൊപ്പമാണ് യുവതി മെഡിക്കൽ കോളജ് ക്യാംപസിലെത്തിയത്.
ഹോസ്റ്റലിലെത്തിയ ശേഷം മാതാപിതാക്കളെ പുറത്തുനിർത്തി യുവതി കെട്ടിടത്തിനുള്ളിലേക്ക് പോയി. എന്നാൽ ഏറെനേരം കഴിഞ്ഞിട്ടും പുറത്തേക്ക് വരാതിരുന്നതോടെ ബന്ധുക്കൾ നടത്തിയ തിരച്ചിലിലാണ് യുവതിയെ കാണാനില്ലെന്ന് വ്യക്തമായത്.
തുടർന്ന് മാതാവ് റസീന ബീവി ഗാന്ധിനഗർ പൊലീസിൽ പരാതി നൽകി. അന്വേഷണത്തിനിടെ വ്യാഴാഴ്ച എറണാകുളത്തെ ഒരു എടിഎമ്മിൽ യുവതി എത്തിയതായി പൊലീസിന് വിവരം ലഭിച്ചു. ഇതിന്റെ അടിസ്ഥാനത്തിൽ സമീപ പ്രദേശങ്ങളിലെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ പരിശോധനയിലാണ് യുവതിയെ കണ്ടെത്തിയത്.
അതേസമയം, കോട്ടയം മെഡിക്കൽ കോളജിൽ യുവതിക്ക് എംബിബിഎസ് പ്രവേശനം ലഭിച്ചിരുന്നില്ലെന്ന് മെഡിക്കൽ കോളജ് അധികൃതർ വ്യക്തമാക്കി. യുവതി വീട്ടുകാരോട് പറഞ്ഞിരുന്ന പ്രവേശന വിവരങ്ങളുമായി ബന്ധപ്പെട്ടും പൊലീസ് പരിശോധന നടത്തിവരികയാണ്.
