ബെംഗളൂരു: കോളേജ് വിദ്യാർത്ഥികളുടെ സുരക്ഷയും അച്ചടക്കവും ഉറപ്പാക്കുന്നതിനായി പഠന യാത്രകൾക്ക് കർശന നിയന്ത്രണങ്ങളുമായി കർണാടക വിദ്യാഭ്യാസ വകുപ്പ്. സർക്കാർ ഒന്നാം ഗ്രേഡ് കോളേജുകൾ നടത്തുന്ന പഠന യാത്രകളിൽ സെൽഫി, സെൽഫി വീഡിയോ, റീൽ എന്നിവ എടുക്കുന്നതിന് വിലക്ക് ഉൾപ്പെടെ ഒൻപത് പ്രധാന നിബന്ധനകളാണ് ഏർപ്പെടുത്തിയിരിക്കുന്നത്. അപകടകരമായ സ്ഥലങ്ങളിൽ വിദ്യാർത്ഥികൾക്ക് സംഭവിക്കാവുന്ന അപകടങ്ങൾ ഒഴിവാക്കുന്നതിനും മൊബൈൽ ഫോൺ ഉപയോഗിച്ചുള്ള ശ്രദ്ധതിരിച്ചിലുകൾ കുറയ്ക്കുന്നതിനുമാണ് പുതിയ മാർഗനിർദേശങ്ങൾ.
പുതിയ നിർദേശപ്രകാരം പഠന യാത്രയ്ക്കിടെ വിദ്യാർത്ഥികൾ സെൽഫി എടുക്കുകയോ റീലുകൾ ചിത്രീകരിക്കുകയോ ചെയ്യാൻ പാടില്ല. യാത്രയുടെ പ്രധാന ഉദ്ദേശ്യം വിദ്യാഭ്യാസപരമായ പഠനവും അനുഭവവുമാകണം എന്നാണ് വകുപ്പിന്റെ നിർദേശം.
അഞ്ച് ദിവസമാണ് വിദ്യാഭ്യാസ യാത്രയുടെ പരമാവധി ദൈർഘ്യം. അതിൽ കൂടുതൽ ദിവസങ്ങളുള്ള ടൂറുകൾ സംഘടിപ്പിക്കാൻ കഴിയില്ല. അതേസമയം, യാത്ര സംഘടിപ്പിക്കുന്നതിന് മുമ്പ് കോളേജ് വിദ്യാഭ്യാസ വകുപ്പിന്റെ മുൻകൂർ രേഖാമൂലമുള്ള അനുമതി നിർബന്ധമാക്കി. യാത്രയുടെ വിശദമായ റൂട്ട്, സന്ദർശിക്കുന്ന സ്ഥലങ്ങളുടെ പട്ടിക തുടങ്ങിയ വിവരങ്ങളും മുൻകൂട്ടി സമർപ്പിക്കണം.
വിദ്യാർത്ഥികളുടെ യാത്രയിൽ മാതാപിതാക്കളുടെ സമ്മതപത്രവും നിർബന്ധമാണ്. യാത്രയ്ക്ക് മുമ്പ് വിദ്യാർത്ഥികൾ സമ്മതപത്രം തയ്യാറാക്കി രക്ഷിതാക്കളുടെ ഒപ്പോടെ ബന്ധപ്പെട്ട വകുപ്പിന് സമർപ്പിക്കണം.
മഴക്കാലത്തും വിദ്യാഭ്യാസ യാത്രകൾ അനുവദിക്കില്ല. പ്രതികൂല കാലാവസ്ഥയും അതുമായി ബന്ധപ്പെട്ട സുരക്ഷാ പ്രശ്നങ്ങളും പരിഗണിച്ചാണ് മഴക്കാലത്ത് ടൂറുകൾക്ക് നിയന്ത്രണം ഏർപ്പെടുത്തിയിരിക്കുന്നത്.
യാത്രയിൽ വിദ്യാർത്ഥികൾക്കൊപ്പം സ്ഥിരം അധ്യാപകർ ഉണ്ടായിരിക്കണമെന്നും നിർദേശമുണ്ട്. ഗസ്റ്റ് അധ്യാപകരെ മാത്രം ചുമതലപ്പെടുത്തി വിദ്യാഭ്യാസ യാത്ര സംഘടിപ്പിക്കാൻ പാടില്ല.
അധ്യാപക ജീവനക്കാരുടെ എണ്ണത്തിനും നിയന്ത്രണമുണ്ട്. യാത്രയിൽ പങ്കെടുക്കുന്ന അധ്യാപക ജീവനക്കാരുടെ എണ്ണം നാലിൽ കൂടരുത്. ഇവരിൽ രണ്ട് വനിതാ ലക്ചറർമാരും ഒരു ഡി ഗ്രേഡ് ജീവനക്കാരിയും ഉണ്ടായിരിക്കണമെന്നാണ് നിർദേശം.
യാത്ര പുറപ്പെടുന്നതിന് മുമ്പ് യാത്രയുടെ റൂട്ടും മറ്റ് വിശദാംശങ്ങളും ബന്ധപ്പെട്ട ലോക്കൽ പോലീസ് സ്റ്റേഷനിൽ അറിയിക്കണം. യാത്രയുടെ സുരക്ഷ ഉറപ്പാക്കുന്നതിന്റെ ഭാഗമായാണ് ഈ നിർദേശം.
അപകടസാധ്യതയുള്ള സ്ഥലങ്ങൾ സന്ദർശിക്കുമ്പോൾ പ്രത്യേക ജാഗ്രതയും നിർബന്ധമാക്കി. നദികൾ, കടൽ, വെള്ളച്ചാട്ടങ്ങൾ, ഇടതൂർന്ന വനപ്രദേശങ്ങൾ, കുത്തനെയുള്ള മലനിരകൾ തുടങ്ങിയ സ്ഥലങ്ങളിലേക്കുള്ള യാത്രകളിൽ ആവശ്യമായ സുരക്ഷാ മുൻകരുതലുകൾ സ്വീകരിക്കണം. ട്രെക്കിംഗ്, നീന്തൽ തുടങ്ങിയ പ്രവർത്തനങ്ങൾ നടത്തുമ്പോൾ സാക്ഷ്യപ്പെടുത്തിയ വിദഗ്ധരുടെ സാന്നിധ്യം ഉറപ്പാക്കുകയും ആവശ്യമായ പ്രാദേശിക സുരക്ഷാ അനുമതികൾ നേടുകയും വേണം.
ഈ നിയന്ത്രണങ്ങൾ സർക്കാർ കോളേജുകൾക്ക് പുറമെ സ്വകാര്യ, എയ്ഡഡ് കോളേജുകൾക്കും ബാധകമായിരിക്കുമെന്ന് സർക്കാർ വ്യക്തമാക്കിയിട്ടുണ്ട്. മാർഗനിർദേശങ്ങൾ ലംഘിക്കുന്ന വിദ്യാഭ്യാസ സ്ഥാപനങ്ങൾക്കെതിരെ അച്ചടക്ക നടപടി സ്വീകരിക്കുമെന്നും മുന്നറിയിപ്പ് നൽകിയിട്ടുണ്ട്.
വിദ്യാർത്ഥികളുടെ വിനോദത്തിനപ്പുറം വിദ്യാഭ്യാസപരമായ ലക്ഷ്യങ്ങൾക്കും സുരക്ഷയ്ക്കും മുൻഗണന നൽകുക എന്നതാണ് പുതിയ നിയന്ത്രണങ്ങളുടെ പ്രധാന ലക്ഷ്യം. പ്രത്യേകിച്ച് അപകടകരമായ സ്ഥലങ്ങളിലെ മൊബൈൽ ഫോൺ ഉപയോഗവും ശ്രദ്ധതിരിച്ചിലുകളും ഒഴിവാക്കുന്നതിലൂടെ ടൂർ അപകടരഹിതമാക്കാനാണ് കർശന നിബന്ധനകളിലൂടെ ശ്രമിക്കുന്നത്.
