ബാങ്ക് പണിമുടക്ക്; കേന്ദ്ര സർക്കാർ ജീവനക്കാർക്ക് സെപ്റ്റംബർ ശമ്പളം സെപ്റ്റംബർ 25ന്
ന്യൂഡൽഹി: രാജ്യവ്യാപക ബാങ്ക് പണിമുടക്ക് പ്രഖ്യാപിച്ച സാഹചര്യത്തിൽ കേന്ദ്ര സർക്കാർ ജീവനക്കാർക്ക് സെപ്റ്റംബർ മാസത്തെ ശമ്പളം നേരത്തെ ലഭിക്കും. സെപ്റ്റംബർ 28 മുതൽ 30 വരെ മൂന്ന് ദിവസത്തെ ബാങ്ക് പണിമുടക്ക് നടക്കാനിരിക്കെയാണ് ശമ്പളവും പെൻഷനും മുൻകൂറായി വിതരണം ചെയ്യാൻ കേന്ദ്ര സർക്കാർ നിർദേശം നൽകിയത്.
സെപ്റ്റംബർ 25ന് തന്നെ കേന്ദ്ര സർക്കാർ ജീവനക്കാരുടെ ശമ്പളം വിതരണം ചെയ്യാൻ എല്ലാ മന്ത്രാലയങ്ങൾക്കും വകുപ്പുകൾക്കും ധനമന്ത്രാലയത്തിന് കീഴിലുള്ള കൺട്രോളർ ജനറൽ ഓഫ് അക്കൗണ്ട്സ് നിർദേശം നൽകി.
പ്രതിരോധം, തപാൽ, ടെലികമ്മ്യൂണിക്കേഷൻസ് ഉൾപ്പെടെയുള്ള കേന്ദ്ര സർക്കാർ ഓഫീസുകളിലെ ജീവനക്കാർക്ക് നിർദേശം ബാധകമാണ്. കേന്ദ്ര സർക്കാർ വ്യവസായ സ്ഥാപനങ്ങളിലെ ജീവനക്കാരുടെ സെപ്റ്റംബർ മാസത്തെ വേതനവും സെപ്റ്റംബർ 25ന് വിതരണം ചെയ്യാമെന്നും നിർദേശത്തിൽ പറയുന്നു.
പെൻഷൻകാർക്കും ആശ്വാസം
കേന്ദ്ര സർക്കാർ പെൻഷൻകാർക്കുള്ള സെപ്റ്റംബർ മാസത്തെ പെൻഷനും സെപ്റ്റംബർ 25ന് തന്നെ ബാങ്കുകൾ/പേയിങ് അക്കൗണ്ട്സ് ഓഫീസുകൾ വഴി വിതരണം ചെയ്യാം.
മുൻകൂറായി നൽകുന്ന ശമ്പളവും പെൻഷനും അഡ്വാൻസ് പേയ്മെന്റായി കണക്കാക്കും. ജീവനക്കാരന്റെയോ പെൻഷൻകാരന്റെയോ മുഴുവൻ മാസത്തെ തുക കണക്കാക്കിയശേഷം ആവശ്യമായ ക്രമീകരണം നടത്തും. വ്യത്യാസമുണ്ടെങ്കിൽ ഒക്ടോബർ മാസത്തെ ശമ്പളത്തിൽ നിന്ന് അത് ക്രമീകരിക്കുമെന്നും നിർദേശത്തിൽ വ്യക്തമാക്കുന്നു.
മൂന്ന് ദിവസത്തെ ബാങ്ക് പണിമുടക്ക്
യുണൈറ്റഡ് ഫോറം ഓഫ് ബാങ്ക് യൂണിയൻസ് (UFBU) സെപ്റ്റംബർ 28 മുതൽ 30 വരെ രാജ്യവ്യാപകമായി മൂന്ന് ദിവസത്തെ പണിമുടക്കിന് ആഹ്വാനം ചെയ്തിട്ടുണ്ട്. അഞ്ച് ദിവസത്തെ ബാങ്കിംഗ് സംവിധാനം ഉൾപ്പെടെയുള്ള വിവിധ ആവശ്യങ്ങളാണ് യൂണിയനുകൾ ഉന്നയിക്കുന്നത്. ബാങ്കുകളുടെ അർധവാർഷിക സാമ്പത്തിക ക്ലോസിംഗ് കാലയളവിനോടും പണിമുടക്ക് ദിവസങ്ങൾ ഒത്തുചേരുന്നതിനാൽ ഇടപാടുകളെ ബാധിക്കാനുള്ള സാധ്യതയുണ്ട്.
ഞായറാഴ്ച ബാങ്കുകൾ തുറക്കും
പണിമുടക്ക് മൂലമുള്ള ബുദ്ധിമുട്ടുകൾ ഒഴിവാക്കുന്നതിനായി ഉപഭോക്താക്കളുടെ സൗകര്യം കണക്കിലെടുത്ത് ഞായറാഴ്ച ബാങ്കുകൾ തുറന്ന് പ്രവർത്തിക്കാനും ധനമന്ത്രാലയം നിർദേശിച്ചിട്ടുണ്ട്. റീജിയണൽ റൂറൽ ബാങ്കുകൾ ഉൾപ്പെടെയുള്ള ബാങ്കുകൾക്ക് നിർദേശം ബാധകമാണ്.
പണിമുടക്ക് നടക്കുകയാണെങ്കിൽ ആവശ്യമായ ബാങ്കിംഗ് സേവനങ്ങൾക്കായി മൊബൈൽ ബാങ്കിംഗ്, എടിഎം, ഇന്റർനെറ്റ് ബാങ്കിംഗ്, ബിസി പോയിന്റുകൾ, യുപിഐ തുടങ്ങിയ ഡിജിറ്റൽ സംവിധാനങ്ങൾ ഉപയോഗിക്കാൻ പൊതുമേഖലാ ബാങ്കുകൾ ഉപഭോക്താക്കളോട് നിർദേശിച്ചിട്ടുണ്ട്. പണിമുടക്ക് ആരംഭിക്കുന്നതിന് മുമ്പ് അത്യാവശ്യ ബാങ്കിംഗ് ഇടപാടുകൾ പൂർത്തിയാക്കാനും ബാങ്കുകൾ ഉപഭോക്താക്കളോട് ആവശ്യപ്പെട്ടിട്ടുണ്ട്.
