നഗോയ: ഏഷ്യന് ഗെയിംസില് തുഴച്ചിലില് ഇന്ത്യയ്ക്ക് വീണ്ടും മെഡല് നേട്ടം. പുരുഷന്മാരുടെ ഡബിള് സ്കള്സ് ഇനത്തില് സത്നാം സിങ്-സല്മാന് ഖാന് സഖ്യം വെങ്കലം സ്വന്തമാക്കി. നഗരഗാവ ഇന്റര്നാഷണല് റെഗാട്ട കോഴ്സില് നടന്ന മത്സരത്തില് 6:13.25 സമയത്തിലാണ് ഇന്ത്യന് ജോഡി ഫിനിഷ് ചെയ്തത്. ചൈനയുടെ സൂഡി യി-യിഡെ നീ സഖ്യം 6:09.77 സമയത്തില് സ്വര്ണം നേടി. ഉസ്ബെക്കിസ്ഥാന്റെ പാവല് സോറിന്-മെഖ്റോജ്ബെക് മമത്കുലോവ് സഖ്യം 6:10.49 സമയത്തില് വെള്ളിയും സ്വന്തമാക്കി. 1000 മീറ്റര് പിന്നിടുമ്പോള് ഇന്ത്യ മൂന്നാം സ്ഥാനത്തായിരുന്നു. ചൈനയ്ക്കും ഉസ്ബെക്കിസ്ഥാനുമായിരുന്നു മുന്നില്.
എന്നാല് മത്സരം അവസാനത്തിലേക്ക് കടന്നതോടെ സത്നാം-സല്മാന് സഖ്യം വേഗം കൂട്ടി. അവസാന 500 മീറ്ററില് മികച്ച മുന്നേറ്റം നടത്തിയ ഇന്ത്യന് താരങ്ങള് രണ്ടാം സ്ഥാനത്തേക്ക് കുതിച്ചെത്തി. അവസാന ഘട്ടത്തില് എതിരാളികള് ശക്തമായി തിരിച്ചെത്തിയതോടെ ഇന്ത്യയ്ക്ക് മൂന്നാം സ്ഥാനത്തേക്ക് പിന്തള്ളപ്പെടേണ്ടിവന്നു. എങ്കിലും മികച്ച പോരാട്ടത്തിനൊടുവില് രാജ്യത്തിനായി വെങ്കല മെഡല് ഉറപ്പാക്കുകയായിരുന്നു ഇന്ത്യന് സഖ്യം. ഈ മെഡല് സത്നാം സിങ്ങിന്റെ കരിയറിലെ രണ്ടാമത്തെ പ്രധാന ഏഷ്യന് മെഡല് കൂടിയാണ്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
2023ല് ഹാങ്ചൗവില് നടന്ന ഏഷ്യന് ഗെയിംസില് വെങ്കലം നേടിയ ഇന്ത്യന് പുരുഷന്മാരുടെ ക്വാഡ്രപ്പിള് സ്കള്സ് ടീമിലും സത്നാം അംഗമായിരുന്നു. അന്ന് മത്സരത്തിനിടെ ശാരീരിക അസ്വസ്ഥതകള് നേരിട്ടിട്ടും ശക്തമായി തിരിച്ചെത്തി രാജ്യത്തിനായി മെഡല് ഉറപ്പാക്കുന്നതില് സത്നാം നിര്ണായക പങ്കുവഹിച്ചിരുന്നു. ഉത്തര്പ്രദേശിലെ അമേഠി ജില്ലക്കാരനായ സല്മാന് ഖാനും ഇന്ത്യന് തുഴച്ചില് രംഗത്തെ ശ്രദ്ധേയ താരമാണ്. കേന്ദ്ര സര്ക്കാരിന്റെ ടാര്ഗറ്റ് ഒളിമ്പിക് പോഡിയം സ്കീമില് (ഉള്പ്പെട്ടിട്ടുള്ള സല്മാന് ഉന്നതതല പരിശീലനവും കായിക സാങ്കേതിക പിന്തുണയും ലഭിക്കുന്നുണ്ട്.
