കൊല്ക്കത്ത/പട്ന: ഇന്ത്യ-ബംഗ്ലാദേശ് അതിര്ത്തി വഴി രാജ്യത്തേക്ക് കടത്താന് ശ്രമിച്ച ഏകദേശം 12 കിലോ വിദേശ സ്വര്ണം പിടികൂടി. വിപണിയില് ഏകദേശം 17 കോടി രൂപ വിലവരുന്ന സ്വര്ണമാണ് ഡയറക്ടറേറ്റ് ഓഫ് റവന്യൂ ഇന്റലിജന്സും (ഡിആര്ഐ) അതിര്ത്തി സുരക്ഷാ സേനയും (ബിഎസ്എഫ്) ചേര്ന്ന് നടത്തിയ വിവിധ പരിശോധനകളില് പിടികൂടിയത്. പശ്ചിമ ബംഗാളിലും ബിഹാറിലുമായാണ് തുടര്ച്ചയായ പരിശോധനകളില് സ്വര്ണം പിടികൂടിയത്. അതിര്ത്തിക്ക് സമീപമുള്ള സ്ഥലങ്ങളില് ഉപേക്ഷിച്ച നിലയിലും ട്രെയിന് യാത്രക്കാരനില് നിന്നുമാണ് സ്വര്ണം കണ്ടെത്തിയത്.
സെപ്റ്റംബര് 20, 21 തീയതികളില് പശ്ചിമ ബംഗാളിലെ ഇന്ത്യ-ബംഗ്ലാദേശ് അതിര്ത്തി റോഡിന് സമീപം ബിഎസ്എഫ് 161-ാം ബറ്റാലിയന് നടത്തിയ പരിശോധനയിലാണ് വിദേശനിര്മിത സ്വര്ണം ആദ്യം കണ്ടെത്തിയത്. ബിഒപി ഗൊംഗ്ര മേഖലയില് നിന്ന് 27 കഷണങ്ങളിലായി ഏകദേശം 3.15 കിലോ സ്വര്ണം പിടിച്ചെടുത്തു. ഉടമസ്ഥനില്ലാത്ത നിലയിലായിരുന്നു സ്വര്ണം കണ്ടെത്തിയത്. തുടര്ന്ന് ഡിആര്ഐ സ്വര്ണം ഏറ്റെടുത്ത് കസ്റ്റംസ് നിയമപ്രകാരം പിടിച്ചെടുത്തു.
സെപ്റ്റംബര് 21ന് ബിഒപി മഹാഖോള മേഖലയിലും സ്വര്ണം കണ്ടെത്തി. അതിര്ത്തി വേലിക്ക് സമീപമുള്ള ഹത്ഖോള ഗ്രാമത്തിലെ കൈപ്പമ്പിന് സമീപം ഒളിപ്പിച്ച നിലയിലായിരുന്നു 24 കാരറ്റ് വിദേശ സ്വര്ണത്തിന്റെ 10 കഷണങ്ങള്. ഏകദേശം 1.16 കിലോ ഭാരമുള്ള സ്വര്ണം ഡിആര്ഐ പിന്നീട് കസ്റ്റഡിയിലെടുത്തു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ബംഗ്ലാദേശ് വഴി വിദേശ സ്വര്ണം ഇന്ത്യയിലേക്ക് കടത്തുകയും പിന്നീട് വിവിധ ഇടങ്ങളിലേക്ക് എത്തിക്കുകയും ചെയ്യുന്ന ശൃംഖലയെ തകര്ക്കുന്നതിന്റെ ഭാഗമായാണ് പരിശോധനകള് നടത്തിയതെന്ന് ഡിആര്ഐ വ്യക്തമാക്കി. സ്വര്ണക്കടത്ത്, ഗതാഗതം, വിതരണം എന്നിവയില് പ്രവര്ത്തിക്കുന്ന ശൃംഖലകളെ കണ്ടെത്തുന്നതിനായി ബിഎസ്എഫുമായി സഹകരിച്ച് പരിശോധനകള് ശക്തമാക്കിയതായും ഡിആര്ഐ അറിയിച്ചു.
