അഹമ്മദാബാദ്: ഗുണ്ടാത്തലവൻ ഗോൾഡി ബ്രാറിന്റെ സംഘത്തിലെ പ്രധാനിയെ അഹമ്മദാബാദിൽ അറസ്റ്റ് ചെയ്തു. കൊലപാതകശ്രമം, വെടിവയ്പ്, പണം തട്ടിയെടുക്കൽ തുടങ്ങിയ 11ലേറെ ഗുരുതര കേസുകളിൽ പൊലീസ് അന്വേഷിച്ചിരുന്ന ആരിഫ് എന്ന ‘പിസ്റ്റൾ’ ആണ് പിടിയിലായത്.
അഹമ്മദാബാദ് ക്രൈം ബ്രാഞ്ച്, അഹമ്മദാബാദ് റൂറൽ സ്പെഷ്യൽ ഓപ്പറേഷൻസ് ഗ്രൂപ്പ് (SOG), ഡൽഹി പൊലീസ് എന്നിവ സംയുക്തമായി നടത്തിയ നീക്കത്തിലാണ് അറസ്റ്റ്. വ്യാഴാഴ്ച പുലർച്ചെ വെജൽപൂർ മേഖലയിൽ നിന്നാണ് പ്രതിയെ പിടികൂടിയത്.
ഗോൾഡി ബ്രാർ സംഘത്തിന്റെ പ്രവർത്തനങ്ങളിൽ പ്രധാന കണ്ണിയായിരുന്നു ആരിഫ്. . പൊലീസ് നിരീക്ഷണത്തിൽ നിന്ന് രക്ഷപ്പെടാൻ ഇയാൾ വിവിധ സ്ഥലങ്ങളിൽ മാറിമാറി താമസിക്കുകയായിരുന്നു. വിവിധ സംസ്ഥാനങ്ങളിലായി ഏജൻസികൾ നടത്തിയ അന്വേഷണത്തിനൊടുവിലാണ് പ്രതിയെ കണ്ടെത്തിയത്.
സാമ്പത്തിക ശൃംഖലയും അന്വേഷിക്കുന്നു
ഗോൾഡി ബ്രാർ സംഘത്തിന്റെ സംഘടിത പണം തട്ടിയെടുക്കൽ ശൃംഖലയുമായി ബന്ധപ്പെട്ട കേസിൽ ഡൽഹി സ്പെഷ്യൽ സെല്ലും ആരിഫിനെ തേടുകയായിരുന്നു. ഇയാളുടെ അറസ്റ്റോടെ സംഘത്തിന്റെ സാമ്പത്തിക ഇടപാടുകളെക്കുറിച്ചും നിർണായക വിവരങ്ങൾ ലഭിക്കുമെന്നാണ് അന്വേഷണ സംഘത്തിന്റെ വിലയിരുത്തൽ.
ആരാണ് ഗോൾഡി ബ്രാർ?
കാനഡ ആസ്ഥാനമായി പ്രവർത്തിക്കുന്ന ഗുണ്ടാത്തലവനാണ് സതീന്ദർജീത് സിംഗ് എന്ന ഗോൾഡി ബ്രാർ. പഞ്ചാബിലെ മുക്ത്സർ സാഹിബ് സ്വദേശിയാണ്. ഗായകൻ സിദ്ധു മൂസെവാലയുടെ 2022ലെ കൊലപാതകവുമായി ബന്ധപ്പെട്ട് ഗോൾഡി ബ്രാറിനെതിരെ ഗുരുതര ആരോപണങ്ങളുണ്ട്.
2024ൽ യുഎപിഎ പ്രകാരം ഇന്ത്യ ഗോൾഡി ബ്രാറിനെ ഭീകരനായി പ്രഖ്യാപിച്ചിരുന്നു. നിലവിൽ ഇയാൾ അമേരിക്കയിലുണ്ടെന്നാണ് റിപ്പോർട്ടുകൾ. ഗോൾഡി ബ്രാറിനെക്കുറിച്ച് വിവരം നൽകുന്നവർക്ക് പഞ്ചാബ് സർക്കാർ അഞ്ച് ലക്ഷം മുതൽ പത്ത് ലക്ഷം രൂപ വരെ പാരിതോഷികം പ്രഖ്യാപിച്ചിരുന്നു.
ഗോൾഡി ബ്രാറിനെ പിടികൂടാൻ സഹായിക്കുന്ന വിവരങ്ങൾ നൽകുന്നവർക്ക് 50,000 യുഎസ് ഡോളർ വരെ പാരിതോഷികം നൽകുമെന്ന് അമേരിക്കൻ ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ (FBI) നേരത്തേ പ്രഖ്യാപിച്ചിരുന്നു.
