കണ്ണൂർ: മദ്യലഹരിയിൽ കാറോടിച്ച് മൂന്ന് പേർക്ക് പരിക്കേറ്റ സംഭവത്തിൽ അഴീക്കൽ കോസ്റ്റൽ പൊലീസ് ഗ്രേഡ് എഎസ്ഐ കെ. രജിത്തിന് സസ്പെൻഷൻ. അന്വേഷണവിധേയമായാണ് സിറ്റി പൊലീസ് കമ്മീഷണർ നടപടി സ്വീകരിച്ചത്.
ചൊവ്വാഴ്ച കണ്ണൂർ കണ്ണോത്തുംചാലിലെ മന്തിക്കടയ്ക്ക് മുന്നിലായിരുന്നു അപകടം. രജിത്ത് ഓടിച്ച കാറിടിച്ച് ഹോട്ടൽ മാനേജ്മെന്റ് വിദ്യാർഥിനി പന്ന്യന്നൂരിലെ എം.കെ. സ്വാതി (22), അതിഥി തൊഴിലാളികളായ ഹവാസ് അലി, റോക്കിബുൾ എന്നിവർക്ക് പരിക്കേറ്റു.
അപകടത്തിന് ശേഷം വാഹനം നിർത്താതെ പോയെന്നാണ് വിവരം. പരിക്കേറ്റ മൂന്ന് പേരും സ്വകാര്യ ആശുപത്രിയിൽ ചികിത്സയിലാണ്.
അപകടത്തിന് പിന്നാലെ രജിത്തിനെ നാട്ടുകാർ തടഞ്ഞുവെച്ച് ചോദ്യം ചെയ്യുന്ന വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.
