പത്തനംതിട്ട: ശബരിമലയില് ഭക്തര് സമര്പ്പിച്ച സ്വര്ണക്കിരീടം സുരക്ഷിതമാണെന്നും യാതൊരു നഷ്ടവും സംഭവിച്ചിട്ടില്ലെന്നും തിരുവാഭരണം കമ്മീഷണര്. യഥാര്ഥ സ്വര്ണക്കിരീടത്തിന് പുറമെ ഭക്തര് വഴിപാടായി സമര്പ്പിച്ച കൃത്രിമ അലങ്കാര കിരീടങ്ങളും സന്നിധാനത്തെ ഭണ്ഡാരപ്പുരയില് സുരക്ഷിതമായി സൂക്ഷിച്ചിട്ടുണ്ടെന്ന് അദ്ദേഹം വ്യക്തമാക്കി. തിരുവാഭരണങ്ങളുടെ കണക്കെടുപ്പിനിടെ സ്വര്ണക്കിരീടം കാണാതായെന്ന തരത്തിലുള്ള റിപ്പോര്ട്ടുകള് പുറത്തുവന്നതിന് പിന്നാലെയാണ് തിരുവാഭരണം കമ്മീഷണറുടെ വിശദീകരണം. ഉയര്ന്നുവന്ന വിവാദങ്ങളിലെ വസ്തുത വ്യക്തമാക്കുന്ന റിപ്പോര്ട്ട് ദേവസ്വം കമ്മീഷണര്ക്ക് സമര്പ്പിച്ചിട്ടുണ്ടെന്നും അദ്ദേഹം പറഞ്ഞു.
തീര്ഥാടകര് സമര്പ്പിക്കുന്ന വഴിപാടുകളില് സ്വര്ണാഭരണങ്ങള്ക്ക് പുറമെ വിവിധ തരത്തിലുള്ള കൃത്രിമ അലങ്കാര വസ്തുക്കളും ഉണ്ടാകാറുണ്ട്. നേരത്തെ പുറത്തുവന്ന വിവരങ്ങള് പ്രകാരം, 2012ല് തമിഴ്നാട്ടില് നിന്നുള്ള ഭക്തര് ശബരിമലയില് ചാര്ത്തിയ സ്വര്ണക്കിരീടത്തിന് 55.72 പവന് ഭാരമുണ്ടായിരുന്നു. എന്നാല് സന്നിധാനത്തെ ഭണ്ഡാരപ്പുരയില് നിലവിലുള്ള കിരീടത്തിന് 240 ഗ്രാം മാത്രമാണ് ഭാരമെന്ന വിവരമാണ് പരിശോധനയ്ക്കിടെ ഉയര്ന്നുവന്നത്. ഇതോടെയാണ് കിരീടത്തെ സംബന്ധിച്ച ആശയക്കുഴപ്പം ശക്തമായത്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
കോടതി ചുമതലപ്പെടുത്തിയ അമിക്കസ് ക്യൂറി ജസ്റ്റിസ് കെ.ടി. ശങ്കരന്റെ മേല്നോട്ടത്തില് നടന്ന തിരുവാഭരണ പരിശോധനയ്ക്ക് ശേഷമാണ് കിരീടത്തിന്റെ ഭാരവുമായി ബന്ധപ്പെട്ട വൈരുധ്യത്തിന്റെ വിവരങ്ങള് പുറത്തുവന്നത്. എന്നാല് കിരീടം സുരക്ഷിതമാണെന്നും നഷ്ടപ്പെട്ടിട്ടില്ലെന്നുമാണ് തിരുവാഭരണം കമ്മീഷണറുടെ ഇപ്പോഴത്തെ വിശദീകരണം. വിഷയത്തില് ദേവസ്വം കമ്മീഷണര്ക്ക് റിപ്പോര്ട്ട് സമര്പ്പിച്ചതായും അദ്ദേഹം അറിയിച്ചു. സ്വര്ണക്കിരീടത്തിന്റെ ഭാരവുമായി ബന്ധപ്പെട്ട് ഉയര്ന്നുവന്ന വൈരുധ്യത്തിനും കിരീടത്തിന്റെ നിലവിലെ സ്ഥിതിയുമായി ബന്ധപ്പെട്ട ആശയക്കുഴപ്പത്തിനും ഔദ്യോഗിക റിപ്പോര്ട്ടിലൂടെയാണ് കൂടുതല് വ്യക്തത ലഭിക്കുക.
