ന്യൂഡൽഹി: രാജ്യത്തിന്റെ വിവിധ ഭാഗങ്ങളിലായി ഒരുകോടിയിലേറെ പേർ ഒരേസമയം വന്ദേ മാതരം ആലപിക്കും. സെപ്റ്റംബർ 25ന് രാവിലെ 11 മണിക്ക് 25,000ത്തിലധികം കേന്ദ്രങ്ങളിലാണ് ആലാപനം സംഘടിപ്പിക്കുന്നത്. വിദ്യാഭാരതി അഖില ഭാരതീയ ശിക്ഷാ സൻസ്ഥാനാണ് ‘നമാമി ഭാരതം’ എന്ന പേരിൽ പരിപാടി സംഘടിപ്പിക്കുന്നത്.
വന്ദേ മാതരത്തിന്റെ 150-ാം വാർഷികാഘോഷങ്ങളുടെ ഭാഗമായാണ് രാജ്യവ്യാപക പരിപാടി. വിദ്യാർഥികൾ, അധ്യാപകർ, രക്ഷിതാക്കൾ തുടങ്ങി വിവിധ വിഭാഗങ്ങളിൽപ്പെട്ടവർ പങ്കെടുക്കും.
വന്ദേ മാതരം ഒരേസമയം ആലപിക്കുക എന്നതിലുപരി, ഗാനത്തിന്റെ ചരിത്രവും സ്വാതന്ത്ര്യസമരവുമായുള്ള ബന്ധവും പുതുതലമുറയിലേക്ക് എത്തിക്കുകയാണ് ലക്ഷ്യമെന്ന് സംഘാടകർ അറിയിച്ചു. പരിപാടിക്ക് മുന്നോടിയായി വിവിധ സ്കൂളുകളിൽ വന്ദേ മാതരത്തെ കേന്ദ്രീകരിച്ച് സംവാദങ്ങൾ, പ്രദർശനങ്ങൾ, സാംസ്കാരിക പരിപാടികൾ തുടങ്ങിയവ സംഘടിപ്പിച്ചിരുന്നു.
ബ്രിട്ടീഷ് ഭരണകാലത്ത് ദേശീയബോധത്തിന്റെ പ്രധാന പ്രതീകങ്ങളിലൊന്നായിരുന്നു വന്ദേ മാതരം. സ്വാതന്ത്ര്യാനന്തരം വന്ദേ മാതരത്തിന് ദേശീയഗീതമെന്ന ഔദ്യോഗിക പദവിയും ലഭിച്ചിരുന്നു. എന്നാൽ പിന്നീട് പതിറ്റാണ്ടുകളോളം വന്ദേമാതരത്തിന് വേണ്ട പ്രാധാന്യമോ പ്രസക്തിയോ ലഭിച്ചില്ല. മാസങ്ങൾക്ക് മുൻപാണ് വന്ദേമാതരത്തിന് ദേശീയഗാനത്തിന് സമാനമായ ചട്ടം ബാധകമാക്കി കേന്ദ്രസർക്കാർ ഉത്തരവിറക്കിയത്.
ദേശീയ തലസ്ഥാനത്തും വിപുലമായ പരിപാടികളാണ് ആസൂത്രണം ചെയ്തിരിക്കുന്നത്. ഡൽഹിയിലെ ഏകദേശം 300 കേന്ദ്രങ്ങളിലായി ഒരുലക്ഷത്തിലേറെ വിദ്യാർഥികളും അധ്യാപകരും രക്ഷിതാക്കളും പൊതുജനങ്ങളും പങ്കെടുക്കുമെന്ന് വിദ്യാഭാരതി ഡൽഹി പ്രാന്ത് ജനറൽ സെക്രട്ടറി ഡോ. സതീഷ് മഹേശ്വരി അറിയിച്ചു.
