റാഞ്ചി: മദ്യശാലയിൽ സാധാരണ എത്തുന്നത് മനുഷ്യരായിരിക്കും. എന്നാൽ ജാർഖണ്ഡിലെ റാഞ്ചിയിൽ ഒരു ‘വ്യത്യസ്ത കസ്റ്റമർ’ എത്തിയതോടെ കടയിലുണ്ടായിരുന്നവരൊക്കെ ഒന്ന് ഞെട്ടി. നേരെ മദ്യശാലയിലേക്ക് കയറിയ പെൺകുരങ്ങ് ഒരു കുപ്പിയിൽ നിന്ന് മദ്യം കുടിച്ച ശേഷം അവിടെത്തന്നെ സുഖമായി കിടന്നുറങ്ങി!
ഓർമാഞ്ചിയിലെ ബ്ലോക്ക് ചൗക്കിലുള്ള മദ്യശാലയിലാണ് രസകരമായ സംഭവം. എല്ലാവരുടെയും കണ്ണ് വെട്ടിച്ചാണ് കുരങ്ങ് കടയ്ക്കുള്ളിലേക്ക് കയറിയതെന്ന് പ്രത്യേകിച്ച് പറയേണ്ടതില്ലല്ലോ. ആദ്യം കടയ്ക്കുള്ളിൽ ഒന്ന് ചുറ്റിനടന്നു.
പിന്നെ അധികം ആലോചിക്കാനൊന്നും നിന്നില്ല. ആദ്യം കണ്ട ‘മാജിക് മൊമന്റ്സ്’
തന്നെ അങ്ങ് അകത്താക്കി. അതോടെ ‘കസ്റ്റമർ’ക്ക് അൽപ്പം ‘ഫി’റ്റ് ആയെന്ന് വേണം കരുതാൻ. ഒടുവിൽ കടയ്ക്കുള്ളിൽ തന്നെ കിടന്ന് ഉറക്കവും തുടങ്ങി. അപ്രതീക്ഷിത അതിഥിയെ കണ്ട കടയുടമയും ജീവനക്കാരും എന്ത് ചെയ്യണമെന്നായാതെ കൺഫ്യൂഷനിലായി. വിവരം അറിഞ്ഞതോടെ കുരങ്ങിനെ സുരക്ഷിതമായി പുറത്തെത്തിക്കാൻ അനിമൽ റസ്ക്യു ടീം സ്ഥലത്തെത്തി.
എന്നാൽ കുരങ്ങിന് അതൊന്നും വലിയ വിഷയമായിരുന്നില്ല. മദ്യം കുടിച്ച് ‘റിലാക്സ്’ ചെയ്ത ശേഷം നല്ല ഉറക്കത്തിലായിരുന്നു കക്ഷി. സംഭവം കാണാൻ എത്തിയവർക്കും കാഴ്ച കൗതുകമായി.കുരങ്ങിന്റെ മദ്യപാനവും പിന്നാലെയുള്ള ഉറക്കവും പകർത്തിയ ദൃശ്യങ്ങൾ സമൂഹമാധ്യമങ്ങളിൽ എത്തിയതോടെ സംഭവം വൈറലായി. മദ്യശാലയിലേക്ക് എത്തിയ ഈ ‘കസ്റ്റമർ’ പണം നൽകാതെയാണ് മടങ്ങിയതെന്നതാണ് കഥയിലെ മറ്റൊരു കൗതുകം!
