യുഎൻ സുരക്ഷാസമിതിയിലെ സ്ഥിരാംഗത്വം; ഇന്ത്യയ്‌ക്ക് റഷ്യയുടെ ശക്തമായ പിന്തുണ; പാശ്ചാത്യ രാജ്യങ്ങൾക്ക് കൂടുതൽ സീറ്റുകൾ അനുവദിക്കരുതെന്ന് ലാവ്‌റോവ്

ന്യൂയോർക്ക്: ഐക്യരാഷ്‌ട്രസഭാ സുരക്ഷാസമിതിയിൽ സ്ഥിരാംഗത്വത്തിനായുള്ള ഇന്ത്യയുടെ ആവശ്യത്തിന് റഷ്യയുടെ ശക്തമായ പിന്തുണ. യുഎൻ പൊതുസഭയുടെ 81-ാം സമ്മേളനത്തിൽ റഷ്യൻ വിദേശകാര്യ മന്ത്രി സെർജി ലാവ്‌റോവാണ് ഇന്ത്യയുടെ സ്ഥാനാർത്ഥിത്വത്തെ പിന്തുണച്ച് നിലപാട് വ്യക്തമാക്കിയത്. ഏഷ്യ, ആഫ്രിക്ക, ലാറ്റിനമേരിക്ക എന്നീ മേഖലകളിൽ നിന്നുള്ള പ്രാതിനിധ്യം വർധിപ്പിക്കണമെന്നാണ് റഷ്യയുടെ നിലപാടെന്നും അദ്ദേഹം വ്യക്തമാക്കി.

സുരക്ഷാസമിതി പരിഷ്‌കരണം നിലവിലെ സ്ഥിരാംഗങ്ങളുടെ അധികാരങ്ങളെ ദുർബലപ്പെടുത്തുന്ന തരത്തിലാകരുതെന്ന് ലാവ്‌റോവ് പറഞ്ഞു. പാശ്ചാത്യ രാജ്യങ്ങൾക്ക് കൂടുതൽ സ്ഥിരാംഗ സീറ്റുകൾ അനുവദിക്കുന്നതിനെയും അദ്ദേഹം എതിർത്തു. പ്രത്യേകിച്ച് ജർമനിയുടെയും ജപ്പാന്റെയും സ്ഥിരാംഗത്വ ആവശ്യങ്ങളെയാണ് റഷ്യ എതിർക്കുന്നതെന്ന് ലാവ്‌റോവ് വ്യക്തമാക്കി.

റഷ്യയ്‌ക്ക് പുറമെ പോർച്ചുഗലും മൗറീഷ്യസും യുഎൻ സുരക്ഷാസമിതിയിലെ സ്ഥിരാംഗത്വത്തിനുള്ള ഇന്ത്യയുടെ ആവശ്യത്തെ പിന്തുണച്ചു. കൂടുതൽ പ്രതിനിധിത്വമുള്ള സുരക്ഷാസമിതി വേണമെന്നും ഇന്ത്യയ്‌ക്ക് സ്ഥിരാംഗത്വം നൽകണമെന്നും പോർച്ചുഗീസ് പ്രധാനമന്ത്രി ലൂയിസ് മോണ്ടിനെഗ്രോ ആവശ്യപ്പെട്ടു.

മൗറീഷ്യസ് വിദേശകാര്യ മന്ത്രി ധനഞ്ജയ് റാംഫുലും ഇന്ത്യയുടെ സ്ഥാനാർത്ഥിത്വത്തിന് രാജ്യത്തിന്റെ പിന്തുണ ആവർത്തിച്ചു. ആഗോള വിഷയങ്ങളിൽ ഇന്ത്യ വഹിക്കുന്ന പങ്ക് പരിഗണിച്ചാണ് പിന്തുണയെന്ന് അദ്ദേഹം വ്യക്തമാക്കി.

ഇതിനിടെ, ജപ്പാൻ പ്രധാനമന്ത്രി സനേ തകായിച്ചിയും സുരക്ഷാസമിതി ഘടനയിൽ അടിയന്തര പരിഷ്‌കരണം വേണമെന്ന് ആവശ്യപ്പെട്ടു. നിലവിലെ അന്താരാഷ്‌ട്ര യാഥാർഥ്യങ്ങളെ പ്രതിഫലിപ്പിക്കുന്ന തരത്തിൽ സമിതിയെ മാറ്റേണ്ടതുണ്ടെന്നാണ് ജപ്പാന്റെ നിലപാട്.

അഞ്ച് സ്ഥിരാംഗങ്ങൾക്ക് വീറ്റോ അധികാരം

നിലവിൽ അമേരിക്ക, റഷ്യ, ചൈന, ഫ്രാൻസ്, ബ്രിട്ടൻ എന്നിവരാണ് യുഎൻ സുരക്ഷാസമിതിയിലെ അഞ്ച് സ്ഥിരാംഗങ്ങൾ. ഇവർക്ക് വീറ്റോ അധികാരമുണ്ട്. മറ്റ് പത്ത് അംഗങ്ങളെ രണ്ട് വർഷത്തെ കാലാവധിയിൽ തിരഞ്ഞെടുക്കുകയാണ് ചെയ്യുന്നത്.

സുരക്ഷാസമിതിയുടെ ഘടനയിൽ മാറ്റം വരുത്തുന്നതിന് യുഎൻ പൊതുസഭയിൽ മൂന്നിൽ രണ്ട് ഭൂരിപക്ഷവും തുടർന്ന് യുഎൻ അംഗരാജ്യങ്ങളിൽ മൂന്നിൽ രണ്ട് രാജ്യങ്ങളുടെ അംഗീകാരവും ആവശ്യമാണ്. നിലവിലുള്ള അഞ്ച് സ്ഥിരാംഗങ്ങളുടെയും അംഗീകാരം ഇതിന് നിർണായകമാണ്.

ഇന്ത്യയുടെ സ്ഥിരാംഗത്വ ആവശ്യത്തിന് വിവിധ രാജ്യങ്ങളിൽ നിന്ന് പിന്തുണ ആവർത്തിച്ച് ലഭിക്കുന്നതിനിടെയാണ് ലാവ്‌റോവിന്റെ പുതിയ പ്രഖ്യാപനം. ഈ വർഷത്തെ യുഎൻ പൊതുസഭാ സമ്മേളനത്തിന്റെ പശ്ചാത്തലത്തിൽ സുരക്ഷാസമിതി പരിഷ്‌കരണം വീണ്ടും പ്രധാന ചർച്ചയായി മാറിയിരിക്കുകയാണ്.