തിരുവനന്തപുരം: സ്വകാര്യ ബസ് മേഖലയിലെ സാമ്പത്തിക പ്രതിസന്ധിക്ക് പരിഹാരം ആവശ്യപ്പെട്ട് ബസ് ഓപ്പറേറ്റേഴ്‌സ് ഫെഡറേഷൻ സമരത്തിലേക്ക്. പ്രിയദർശിനി സൗജന്യ യാത്രാ പദ്ധതി മൂലം സ്വകാര്യ ബസ് മേഖല പ്രതിസന്ധിയിലായെന്നാണ് സംഘടനയുടെ ആരോപണം. ആവശ്യങ്ങളിൽ സർക്കാർ അനുകൂല തീരുമാനം സ്വീകരിച്ചില്ലെങ്കിൽ നവംബർ ആദ്യവാരം സംസ്ഥാനവ്യാപകമായി സർവീസുകൾ പൂർണമായി നിർത്തിവച്ച് പണിമുടക്ക് നടത്തുമെന്ന് ഫെഡറേഷൻ ഭാരവാഹികൾ അറിയിച്ചു.
സമരത്തിന്റെ ആദ്യഘട്ടമായി ഒക്ടോബർ 14ന് ബസുടമകളും കുടുംബാംഗങ്ങളും സെക്രട്ടേറിയറ്റിലേക്ക് മാർച്ചും ധർണയും നടത്തും. സ്വകാര്യ ബസുടമകളെയും തൊഴിലാളികളെയും സംരക്ഷിക്കാൻ അടിയന്തര നടപടി സ്വീകരിക്കണമെന്നാണ് പ്രധാന ആവശ്യം.
വിദ്യാർഥികളുടെ ടിക്കറ്റ് നിരക്ക് ഉൾപ്പെടെയുള്ള ബസ് ചാർജ് വർധിപ്പിക്കണമെന്നും സംഘടന ആവശ്യപ്പെട്ടു. കൂടാതെ ടൈമിംഗ് കോൺഫറൻസുകൾ ഓൺലൈനായി മാത്രം നടത്തണമെന്ന ട്രാൻസ്പോർട്ട് കമ്മീഷണറുടെ ഉത്തരവ് പിൻവലിക്കണമെന്നും ബസുടമകൾ ആവശ്യപ്പെടുന്നു.
മൂന്ന് ഘട്ടങ്ങളിലായി സമരം
സ്വകാര്യ ബസ് മേഖലയിലെ പ്രതിസന്ധി പരിഹരിക്കാൻ സർക്കാർ, വിദഗ്ധ സമിതി എന്നിവ മുന്നോട്ടുവച്ച പാക്കേജുകൾ നടപ്പാക്കാത്തതിലും ബസ് ഓപ്പറേറ്റേഴ്‌സ് ഫെഡറേഷന് എതിർപ്പുണ്ട്. പെർമിറ്റുള്ള സ്വകാര്യ ബസുകൾ വാടകയ്‌ക്കെടുത്ത് സർക്കാർ സർവീസ് നടത്താമെന്ന വിദഗ്ധ സമിതി ശുപാർശയും നടപ്പാക്കണം എന്നാണ് സംഘടനയുടെ ആവശ്യം.
ഇക്കാര്യങ്ങളിൽ സർക്കാർ നടപടി സ്വീകരിക്കാത്തതിനെ തുടർന്നാണ് മൂന്ന് ഘട്ടങ്ങളിലായി സമരപരിപാടികൾ പ്രഖ്യാപിച്ചിരിക്കുന്നത്.
ഒക്ടോബർ 14ലെ സെക്രട്ടേറിയറ്റ് മാർച്ചിനും ധർണയ്‌ക്കും പിന്നാലെ ഒക്ടോബർ അവസാനവാരം സംഘടനാ ഭാരവാഹികൾ സെക്രട്ടേറിയറ്റ് പടിക്കൽ നിരാഹാര സമരം നടത്തും. ഇതിന് ശേഷവും സർക്കാർ അനുകൂല തീരുമാനം സ്വീകരിച്ചില്ലെങ്കിൽ നവംബർ ആദ്യവാരം സംസ്ഥാനത്തെ സ്വകാര്യ ബസ് സർവീസുകൾ പൂർണമായി നിർത്തിവച്ച് പണിമുടക്ക് നടത്തുമെന്ന് ഫെഡറേഷൻ അറിയിച്ചു.
പ്രിയദർശിനി സൗജന്യ യാത്രാ പദ്ധതി സ്വകാര്യ ബസ് മേഖലയെ സാമ്പത്തികമായി ബാധിക്കുന്നുവെന്ന നിലപാടിലാണ് സംഘടന. ബസുടമകളും തൊഴിലാളികളും നേരിടുന്ന പ്രശ്നങ്ങൾ പരിഹരിക്കുന്നതിന് അടിയന്തരമായി സർക്കാർ ഇടപെടണമെന്നാണ് ഫെഡറേഷന്റെ ആവശ്യം.
