കൊച്ചി: ചെക്ക് കേസുകളിൽ ശിക്ഷിക്കപ്പെട്ട പാലാ എംഎൽഎ മാണി സി. കാപ്പനെ അയോഗ്യനാക്കണമെന്ന പരാതിയിൽ സ്പീക്കർ ഉചിതമായ തീരുമാനം എടുക്കണമെന്ന് ഹൈക്കോടതി നിർദേശിച്ചു. കേസിലെ പരാതിക്കാരനായ പ്രവാസി വ്യവസായി ദിനേശ് മേനോൻ സമർപ്പിച്ച ഹർജി പരിഗണിച്ചാണ് കോടതിയുടെ നിർദേശം.
മാണി സി. കാപ്പനെതിരായ അയോഗ്യതാ പരാതിയിൽ സ്പീക്കർ തീരുമാനമെടുക്കണമെന്നും, വിഷയം ഗവർണറുടെ പരിധിയിലാണെന്ന് കണ്ടെത്തുന്ന പക്ഷം ആവശ്യമായ നടപടിക്കായി ഗവർണർക്ക് കൈമാറണമെന്നും ഹൈക്കോടതി വ്യക്തമാക്കി. തീരുമാനം വൈകിക്കരുതെന്നും കോടതി നിർദേശിച്ചു.
മാണി സി. കാപ്പനെ കോടതി ശിക്ഷിച്ചിട്ടും സ്പീക്കറും തിരഞ്ഞെടുപ്പ് കമ്മീഷനും ആവശ്യമായ നടപടികൾ സ്വീകരിച്ചില്ലെന്നാണ് ഹർജിക്കാരന്റെ ആരോപണം. ശിക്ഷയുടെ പശ്ചാത്തലത്തിൽ പാലാ നിയമസഭാ സീറ്റ് ഒഴിഞ്ഞതായി സ്പീക്കർ വിജ്ഞാപനം പുറപ്പെടുവിക്കണമെന്നും തുടർന്ന് പാലായിൽ ഉപതിരഞ്ഞെടുപ്പ് നടത്താൻ തിരഞ്ഞെടുപ്പ് കമ്മീഷന് നിർദേശം നൽകണമെന്നും ഹർജിയിൽ ആവശ്യപ്പെട്ടിരുന്നു.
അതേസമയം, ഹർജി നിലനിൽക്കില്ലെന്നാണ് മാണി സി. കാപ്പൻ ഹൈക്കോടതിയിൽ സമർപ്പിച്ച എതിർ സത്യവാങ്മൂലത്തിൽ വ്യക്തമാക്കിയത്.
നാല് കേസുകളിൽ ശിക്ഷ
ചെക്ക് കേസുകളുമായി ബന്ധപ്പെട്ട് നാല് കേസുകളിലായി മാണി സി. കാപ്പന് കോടതി പ്രത്യേകം പ്രത്യേകം ശിക്ഷ വിധിച്ചിരുന്നു. ആകെ മൂന്നര വർഷം തടവും 5.30 കോടി രൂപ പിഴയും വിധിച്ചിട്ടുണ്ടെന്നാണ് ഹർജിയിലെ വിശദീകരണം.
ശിക്ഷയ്‌ക്ക് പിന്നാലെ നിയമസഭാംഗത്വം സംബന്ധിച്ച നിയമപരമായ നടപടികൾ സ്വീകരിക്കേണ്ടതുണ്ടോ എന്നതായിരുന്നു ഹർജിയുടെ പ്രധാന ആവശ്യം. ഇക്കാര്യത്തിൽ ബന്ധപ്പെട്ട ഭരണഘടനാ സ്ഥാപനങ്ങളും അധികാരികളും ഉചിതമായ തീരുമാനം എടുക്കണമെന്ന നിലപാടാണ് ഹൈക്കോടതി നിർദേശത്തിലൂടെ വ്യക്തമാക്കിയത്.
കേസിൽ സ്പീക്കറുടെ തുടർനടപടി എന്തായിരിക്കുമെന്നതാണ് ഇനി ശ്രദ്ധേയം. ഗവർണറാണ് വിഷയത്തിൽ തീരുമാനം എടുക്കേണ്ടതെന്ന് സ്പീക്കർ കണ്ടെത്തുന്ന പക്ഷം വിഷയം ഗവർണർക്ക് കൈമാറാനും ഹൈക്കോടതി നിർദേശിച്ചിട്ടുണ്ട്.
