ന്യൂഡൽഹി: ഇന്ത്യ വധിച്ച ലഷ്കർ ഭീകരന് പകരം വ്യാജനെ അവതരിപ്പിച്ച് ലോകരാഷ്‌ട്രങ്ങൾക്ക് മുൻപിൽ വീണ്ടും അപഹാസ്യരായി പാകിസ്ഥാൻ. ലഷ്കറെ തൊയിബ ഭീകരനായ ഹാഷിം മൂസ ജീവനൊടെയുണ്ടെന്ന് സ്ഥാപിക്കാനായി കഴിഞ്ഞ ദിവസം മറ്റൊരാളെ മാധ്യമങ്ങൾക്ക് മുന്നിലെത്തിച്ചിരുന്നു. പാക് സൈന്യം വാർത്ത സമ്മേളനത്തിൽ അവതരിപ്പിച്ചയാൾ ഹാഷിം മൂസയല്ലെന്ന് സ്വതന്ത്ര ഏജൻസികളും പ്രതിരോധരംഗത്തെ വിദഗ്ധരും സാങ്കേതിക വിദ്യയുടെ സഹായത്തോടെ സ്ഥിരീകരിച്ചതോടെയാണ് പാകിസ്ഥാന്റെ നാണംകെട്ട കളി പുറത്തുവന്നത്.
ജമ്മുകശ്മീരിലെ ബുദ്ഗാമിൽ ബുധനാഴ്ച നടന്ന ഏറ്റുമുട്ടലിൽ ഹാഷിം മൂസ കൊല്ലപ്പെട്ടെന്ന് ഇന്ത്യൻ സൈന്യം അറിയിച്ചിരുന്നു. മുൻ പാക് സൈനികനും സ്പെഷ്യൽ സർവീസസ് ഗ്രൂപ്പ് കമാൻഡോയുമായ മുഹമ്മദ് ആസിഫാണ് ഹാഷിം മൂസ എന്ന പേരിൽ അറിയപ്പെട്ടിരുന്നതെന്നും ഇന്ത്യൻ സൈന്യം വ്യക്തമാക്കിയിരുന്നു.
പിന്നാലെ പാക് സൈന്യത്തിന്റെ മാധ്യമവിഭാഗം മേധാവി ലെഫ്റ്റനന്റ് ജനറൽ അഹമ്മദ് ഷരീഫ് ചൗധരി ഒരാളെ മാധ്യമങ്ങൾക്ക് മുന്നിലെത്തിക്കുകയായിരുന്നു. 2000ൽ പാകിസ്ഥാൻ സൈന്യത്തിൽ ചേർന്നതായും 2005ൽ സ്പെഷ്യൽ സർവീസസ് ഗ്രൂപ്പിൽ പ്രവേശിച്ചതായും അയാൾ അവകാശപ്പെട്ടു. 18 വർഷം എസ്‌എസ്‌ജിയിൽ സേവനം ചെയ്ത ശേഷം 2023ൽ ഹവിൽദാർ പദവിയിൽ വിരമിച്ചെന്നും താൻ ജീവനോടെയുണ്ടെന്നും വാർത്താസമ്മേളനത്തിൽ പ്രത്യക്ഷപ്പെട്ട വ്യക്തി പറഞ്ഞു.
തുടർന്ന് ഹാഷിം മൂസയുടെ പഴയ ചിത്രങ്ങളും കഴിഞ്ഞദിവസം പാക് സൈന്യം അവതരിപ്പിച്ച അപരന്റെ ചിത്രങ്ങളും സാങ്കേതികവിദ്യയുടെ സഹായത്തോടെ താരതമ്യം ചെയ്തപ്പോഴാണ് രണ്ടും രണ്ടാളുകളാണെന്ന് വ്യക്തമായത്. പാക് സൈന്യം അവതരിപ്പിച്ചയാളുടെ മുഖത്തിന്റെ ആകൃതി, മൂക്ക്, ചെവി, കണ്ണുകളുടെ സ്ഥാനം എന്നിവ ഹാഷിം മൂസയുടെ പഴയ ചിത്രങ്ങളിൽ നിന്നും വ്യത്യസ്തമാണെന്ന് വിദഗ്ധർ ചൂണ്ടിക്കാട്ടി.
ആരാണ് ഹാഷിം മൂസ?
കശ്മീരിലെ പീർ പഞ്ചാൽ മേഖലയിലും താഴ്‌വരയിലും സാധാരണക്കാർക്കും സുരക്ഷാസേനയ്‌ക്കുമെതിരായ നിരവധി ആക്രമണങ്ങളുടെ സൂത്രധാരനായിരുന്നു ലഷ്കർ ഭീകരനായിരുന്നു മുഹമ്മദ് ആസിഫ് എന്ന ഹാഷിം മൂസയെന്നാണ് ഇന്ത്യൻ സുരക്ഷാ ഏജൻസികളുടെ വിലയിരുത്തൽ.
2025ലെ പഹൽഗാം ഭീകരാക്രമണത്തിന് പിന്നാലെ പുറത്തുവന്ന നാല് ലഷ്കർ ഭീകരരുടെ ചിത്രങ്ങളിൽ ഹാഷിം മൂസയും ഉൾപ്പെട്ടിരുന്നു. പീർ പഞ്ചാലിലെ ദുർഘടമായ ഭൂപ്രദേശങ്ങളിൽ വർഷങ്ങളോളം സുരക്ഷാസേനയുടെ കണ്ണുവെട്ടിച്ച് പ്രവർത്തിക്കാൻ ഇയാളുടെ സൈനിക പരിശീലനം സഹായിച്ചിരുന്നുവെന്നും ഇന്ത്യൻ സൈന്യം വ്യക്തമാക്കിയിരുന്നു
2006 മുതൽ 2008 വരെ മുൻ പാക് പ്രസിഡന്റ് പർവേസ് മുഷറഫിന്റെ സുരക്ഷാ സംഘത്തിൽ ഇയാൾ പ്രവർത്തിച്ചിരുന്നതായും വിവരങ്ങളുണ്ട്. ബലൂചിസ്ഥാനിലെ ഭീകരവിരുദ്ധ സൈനിക നീക്കങ്ങളിലും ഇയാൾ പങ്കെടുത്തിരുന്നതായാണ് റിപ്പോർട്ടുകൾ.
