ന്യൂഡൽഹി: വടക്കുകിഴക്കൻ ഡൽഹി കലാപവുമായി ബന്ധപ്പെട്ട ഗൂഢാലോചനക്കേസിൽ ഭീകരവാദി ഷർജീൽ ഇമാമിന് അനുവദിച്ച ഇടക്കാല ജാമ്യം റദ്ദാക്കണമെന്ന് ആവശ്യപ്പെട്ട് ഡൽഹി പൊലീസ് കോടതിയെ സമീപിച്ചു. ജാമ്യവ്യവസ്ഥകൾ ലംഘിച്ച് മാധ്യമപ്രവർത്തകരുമായി സംസാരിച്ചെന്ന് ചൂണ്ടിക്കാട്ടിയാണ് കോടതിയെ സമീപിച്ചത്. മാധ്യമങ്ങളോട് സംസാരിക്കുന്നതിന്റെ ദൃശ്യങ്ങൾ പുറത്തുവന്നിട്ടുണ്ടെന്നും പൊലീസ് കോടതിയെ അറിയിച്ചു.
ബന്ധുവിന്റെ വിവാഹത്തിൽ പങ്കെടുക്കുന്നതിനായി ഒക്ടോബർ 4 മുതൽ 10 വരെ ഏഴ് ദിവസത്തേക്കാണ് കർക്കർദൂമ കോടതി ഷർജീൽ ഇമാമിന് ഇടക്കാല ജാമ്യം അനുവദിച്ചത്. അഡീഷണൽ സെഷൻസ് ജഡ്ജി സമീർ ബജ്പായിയാണ് ജാമ്യം അനുവദിച്ചത്. 50,000 രൂപയുടെ ജാമ്യബോണ്ടും തുല്യത്തുകയ്‌ക്കുള്ള ആൾജാമ്യവും സമർപ്പിക്കണമെന്നതടക്കമുള്ള വ്യവസ്ഥകളും കോടതി മുന്നോട്ടുവച്ചിരുന്നു.
ജാമ്യം അനുവദിക്കുമ്പോൾ കേസുമായി ബന്ധപ്പെട്ട വ്യക്തികളുമായോ സാക്ഷികളുമായോ ബന്ധപ്പെടരുതെന്നും സാമൂഹികമാധ്യമങ്ങൾ ഉപയോഗിക്കരുതെന്നും കോടതി നിർദേശിച്ചിരുന്നു. കുടുംബാംഗങ്ങൾ ഒഴികെയുള്ളവരുമായി കൂടിക്കാഴ്ച നടത്തുന്നതിനും നിയന്ത്രണങ്ങളുണ്ടായിരുന്നു. മാധ്യമപ്രവർത്തകരുമായി സംസാരിക്കരുതെന്ന വ്യവസ്ഥയും നിലനിന്നിരുന്നതായി പൊലീസ് ചൂണ്ടിക്കാട്ടുന്നു.
എന്നാൽ, ജാമ്യകാലയളവിൽ ഷർജീൽ ഇമാം മാധ്യമപ്രവർത്തകരുമായി സംസാരിക്കുന്നതിന്റെ വീഡിയോ ദൃശ്യങ്ങൾ പുറത്തുവന്നിട്ടുണ്ടായിരുന്നു. ഇത് ജാമ്യവ്യവസ്ഥകളുടെ ലംഘനമാണെന്ന് ചൂണ്ടിക്കാട്ടിയാണ് ഇടക്കാല ജാമ്യം റദ്ദാക്കണമെന്ന ആവശ്യം ഉന്നയിച്ചിരിക്കുന്നത്.
2020 ഫെബ്രുവരിയിൽ വടക്കുകിഴക്കൻ ഡൽഹിയിലുണ്ടായ ഹിന്ദു വിരുദ്ധ കലാപത്തിൽ 53 പേർ കൊല്ലപ്പെടുകയും 700ലധികം പേർക്ക് പരിക്കേൽക്കുകയും ചെയ്തിരുന്നു. പൗരത്വ ഭേദഗതി നിയമവുമായി ബന്ധപ്പെട്ട പ്രതിഷേധങ്ങൾക്കിടെയാണ് അക്രമം പൊട്ടിപ്പുറപ്പെട്ടത്. കലാപത്തിന് പിന്നിലെ വലിയ ഗൂഢാലോചനയുമായി ബന്ധപ്പെട്ട കേസിൽ ഷർജീൽ ഇമാമിനെതിരെ നിയമവിരുദ്ധ പ്രവർത്തനങ്ങൾ തടയൽ നിയമമായ യു.എ.പി.എ ഉൾപ്പെടെയുള്ള വകുപ്പുകൾ ചുമത്തിയിട്ടുണ്ട്.
