പത്തനംതിട്ട: ഓണ്‍ലൈനില്‍ 1000 രൂപയുടെ എല്‍ഇഡി പിക്‌സല്‍ ലൈറ്റ് ഓര്‍ഡര്‍ ചെയ്ത യുവാക്കള്‍ക്ക് ലഭിച്ചത് മൂത്രം നിറച്ച മദ്യക്കുപ്പിയെന്ന് പരാതി. കോന്നി അരുവാപ്പുലം സ്വദേശി സനുവിനും സുഹൃത്ത് ഓമനക്കുട്ടനുമാണ് ദുരനുഭവമുണ്ടായത്. സംഭവത്തില്‍ നിയമനടപടിയുമായി മുന്നോട്ടുപോകുമെന്ന് സനു വ്യക്തമാക്കി. ഓമനക്കുട്ടനുവേണ്ടിയാണ് സനു ഓണ്‍ലൈന്‍ വഴി 1000 രൂപയുടെ എല്‍ഇഡി പിക്‌സല്‍ ലൈറ്റ് ഓര്‍ഡര്‍ ചെയ്തത്. കൊറിയര്‍ വഴിയെത്തിയ പാക്കറ്റ് പ്രമുഖ ഡെലിവറി കമ്പനിയായ ഷാഡോഫാക്‌സ് ഇന്ത്യയുടെ ഡെലിവറി ജീവനക്കാരനാണ് കൈമാറിയത്. പാക്കറ്റ് സ്വീകരിച്ച യുവാക്കള്‍ ഓര്‍ഡര്‍ തുകയായ 1000 രൂപ നല്‍കുകയും ചെയ്തു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
തുടര്‍ന്ന് സാധനം ഉപയോഗിക്കാനായി പാക്കറ്റ് തുറന്നപ്പോഴാണ് എല്‍ഇഡി ലൈറ്റിന് പകരം പ്രീമിയം മദ്യക്കുപ്പിയില്‍ നിറച്ച ദ്രാവകം കണ്ടത്. ഇത് മനുഷ്യ മൂത്രമാണെന്നാണ് യുവാക്കളുടെ ആരോപണം. ഓര്‍ഡര്‍ ചെയ്ത ഉല്‍പ്പന്നത്തിന് പകരം ഇത്തരമൊരു വസ്തു ലഭിച്ചതില്‍ യുവാക്കള്‍ പ്രതിഷേധം അറിയിച്ചു. പണം നഷ്ടപ്പെട്ടതിലുപരി, ഇത്തരത്തില്‍ കബളിപ്പിക്കപ്പെട്ടതിലാണ് തങ്ങളുടെ പ്രതിഷേധമെന്ന് സനുവും ഓമനക്കുട്ടനും പറഞ്ഞു. സംഭവത്തിന് ഉത്തരവാദികളായവര്‍ക്കെതിരെ ശക്തമായ നിയമനടപടി സ്വീകരിക്കാനാണ് ഇവരുടെ തീരുമാനം. കോന്നി പോലീസിലും ഉപഭോക്തൃ ഫോറത്തിലും പരാതി നല്‍കാന്‍ ഒരുങ്ങുകയാണെന്നും സനു അറിയിച്ചു.
