ന്യൂഡല്‍ഹി: ആര്‍എസ്എസിനെതിരെ രാഹുല്‍ ഗാന്ധി നടത്തിയ പരാമര്‍ശങ്ങളില്‍ രൂക്ഷ വിമര്‍ശനവുമായി ബിജെപി ദേശീയ ജനറല്‍ സെക്രട്ടറി സ്മൃതി ഇറാനി. സ്ത്രീകളെക്കുറിച്ചുള്ള രാഹുലിന്റെ നിലപാട് അദ്ദേഹത്തിന്റെ പെരുമാറ്റത്തില്‍ തന്നെ വ്യക്തമാണെന്നും വാര്‍ത്തകളില്‍ നിറഞ്ഞുനില്‍ക്കാന്‍ വിലകുറഞ്ഞ പരാമര്‍ശങ്ങള്‍ നടത്തുകയാണ് ലോക്സഭയിലെ പ്രതിപക്ഷ നേതാവെന്നും സ്മൃതി ഇറാനി ആരോപിച്ചു. ആര്‍എസ്എസിനെക്കുറിച്ച് രാഹുല്‍ ഗാന്ധി സമൂഹമാധ്യമത്തില്‍ പങ്കുവെച്ച കുറിപ്പിനോട് പ്രതികരിക്കുകയായിരുന്നു അവര്‍. യൂണിഫോം ധരിച്ച വനിതാ പൊലീസ് ഉദ്യോഗസ്ഥയോട് രാഹുല്‍ മോശമായി പെരുമാറിയെന്ന ആരോപണം ചൂണ്ടിക്കാട്ടിയ സ്മൃതി ഇറാനി, സ്ത്രീകളോടുള്ള അദ്ദേഹത്തിന്റെ സമീപനം ഇതില്‍നിന്ന് വ്യക്തമാണെന്ന് പറഞ്ഞു.
”രാഹുല്‍ ഗാന്ധിയുടെ സ്ത്രീകളോടുള്ള സമീപനം യൂണിഫോം ധരിച്ച വനിതാ പൊലീസ് ഉദ്യോഗസ്ഥയോട് അദ്ദേഹം പെരുമാറിയ രീതിയില്‍ വ്യക്തമാണ്. ഇത്തരത്തില്‍ ആവര്‍ത്തിച്ച് നിലവാരമില്ലാത്ത പരാമര്‍ശങ്ങള്‍ നടത്തുന്ന ഒരാളെക്കുറിച്ച് അഭിപ്രായം പറയാന്‍ എന്തിനാണ് സ്ത്രീകളോട് ആവശ്യപ്പെടുന്നത്?” എന്നായിരുന്നു സ്മൃതി ഇറാനിയുടെ പ്രതികരണം. സ്ത്രീകളെക്കുറിച്ച് പിന്തിരിപ്പന്‍ ചിന്താഗതിയുള്ളവരെ സമൂഹം മാറ്റിനിര്‍ത്തണമെന്നും സ്മൃതി ഇറാനി പറഞ്ഞു. ബിജെപിയിലും ആര്‍എസ്എസിലെ വനിതാ പ്രവര്‍ത്തകര്‍ക്കിടയിലും ഉള്‍പ്പെടെ സമൂഹത്തിന്റെ വിവിധ മേഖലകളില്‍ സ്ത്രീകള്‍ കരുത്തോടെ മുന്നേറുകയാണെന്നും അവര്‍ വ്യക്തമാക്കി.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ഇത്തരത്തിലുള്ള അധിക്ഷേപകരമായ പരാമര്‍ശങ്ങള്‍ ഏതെങ്കിലും ഒരു വിഭാഗത്തിലെ സ്ത്രീകളെ മാത്രമല്ല, സമൂഹത്തിലെ എല്ലാ സ്ത്രീകളെയും അപമാനിക്കുന്നതാണെന്നും സ്മൃതി ഇറാനി ആരോപിച്ചു. വാര്‍ത്തകളില്‍ ഇടംനേടാന്‍ രാഹുല്‍ ഗാന്ധി വിലകുറഞ്ഞ രാഷ്‌ട്രീയ പ്രസ്താവനകള്‍ നടത്തുകയാണെന്നും അവര്‍ വിമര്‍ശിച്ചു.
