ന്യൂഡൽഹി :ക്രിക്കറ്റ് ഇതിഹാസം ഡോൺ ബ്രാഡ്മാനു ശേഷം ലോകം കണ്ട ഏറ്റവും മികച്ച ബാറ്റ്സ്മാൻ സച്ചിൻ ടെണ്ടുൽക്കറാണെന്ന് ആസ്ട്രേലിയൻ മുൻ ക്യാപ്ടൻ റിക്കി പോണ്ടിംഗ് .ടെണ്ടുൽക്കർ ഇൻ വിസ്ഡൻ : ആൻ ആന്തോളജി എന്ന പുസ്തകത്തിന് നൽകിയ ആമുഖത്തിലാണ് പോണ്ടിംഗിന്റെ പരാമർശം.
ഒന്നോ രണ്ടോ വർഷത്തേക്ക് മുൻ നിരയിൽ നിൽക്കാൻ ക്രിക്കറ്റ് താരങ്ങൾക്ക് കഴിഞ്ഞേക്കും . അതൊരു നല്ല വർഷമായി പരിഗണിക്കാൻ കഴിയും . എന്നാൽ സച്ചിനെപ്പോലെ കരിയറിൽ മുഴുവനും സ്ഥിരത നിൽനിർത്താൻ കഴിഞ്ഞെങ്കിൽ മാത്രമേ അതിന് മഹത്തായത് എന്ന് വിളിക്കപ്പെടാൻ അവകാശമുള്ളൂ . പോണ്ടിംഗ് പറഞ്ഞു.
തന്റെ ക്രിക്കറ്റ് കാലത്ത് കണ്ടവരിൽ ഏറ്റവും മികച്ചതാരെന്ന ചോദ്യത്തിന് ഒറ്റ ഉത്തരം – അത് സച്ചിനാണെന്ന് പോണ്ടിംഗ് വ്യക്തമാക്കുന്നു . കളിയോടുള്ള സ്നേഹവും ലക്ഷ്യങ്ങൾ പൂർത്തീകരിക്കാനുള്ള കഴിവും സച്ചിന്റെ പ്രത്യേകതയാണ് . ലോകകപ്പ് വിജയിക്കുക എന്ന എക്കാലത്തെയും ലക്ഷ്യം ഒടുവിൽ താൻ പങ്കെടുത്ത ആറാമത് ലോകകപ്പിൽ നേടാൻ അദ്ദേഹത്തിനായി . പോണ്ടിംഗ് ആമുഖത്തിൽ പറഞ്ഞു.
ഇനിയാർക്കെങ്കിലും ഇരുനൂറു ടെസ്റ്റുകൾ കളിക്കാൻ കഴിയുമെന്ന് കരുതുന്നില്ലെന്ന് വ്യക്തമാക്കിയ പോണ്ടിംഗ് നൂറ് അന്താരാഷ്ട്ര സെഞ്ച്വറികൾ എന്ന ടെണ്ടുൽക്കറുടെ റിക്കോർഡും തകർക്കപ്പെടില്ലെന്ന് സൂചിപ്പിക്കുന്നുണ്ട് . ടെണ്ടുൽക്കറെ പുറത്താക്കാനുള്ള തന്ത്രങ്ങൾക്ക് വേണ്ടി ആസ്ട്രേലിയൻ ടീം മണിക്കൂറുകളോളം തല പുകച്ചിറ്റുണ്ടെന്നും പോണ്ടിംഗ് ആമുഖത്തിൽ വ്യക്തമാക്കുന്നുണ്ട് .