റായ്പൂര്: ഛത്തീസ്ഗഢില് മാവോയിസ്റ്റ് ആക്രമണത്തില് രണ്ട് ബിഎസ്എഫ് സൈനികര് കൊല്ലപ്പെട്ടു. നാല് പേര്ക്ക് പരിക്കേറ്റു. കാങ്കേര് ജില്ലയിലെ ഛോട്ടേബേത്തിയ- പഖാന്ജോര് വനമേഖലയില് പുലര്ച്ചെ 2.30 ഓടെയായിരുന്നു ഏറ്റുമുട്ടല്. പട്രോളിങ് നടത്തുകയായിരുന്ന ബിഎസ്എഫ് സംഘത്തെ സായുധരായ മാവോയിസ്റ്റ് സംഘം ആക്രമിക്കുകയായിരുന്നു.
തലസ്ഥാനമായ റായ്പൂരില് നിന്നും 300 കിലോമീറ്റര് അകലെയാണ് ഈ പ്രദേശം. പ്രദേശത്ത് മാവോയിസ്റ്റുകള് ബന്ദിന് ആഹ്വാനം ചെയ്തിരുന്നു. ഇതിന്റെ ഭാഗമായിട്ടായിരുന്നു ആക്രമണമെന്നാണ് സൂചന. വിജയ് കുമാര്, രാകേഷ് നെഹ് റ എന്നിവരാണ് മരിച്ച ബിഎസ്എഫ് ജവാന്മാര്.
മനോജ് കുമാര്, തോംസണ്, ജഗദീഷ്, ബപ്പ എന്നിവര്ക്കാണ് പരിക്കേറ്റത്. ഇവരെ ഹെലികോപ്ടര്മാര്ഗം റായ്പൂരിലെ ആശുപത്രിയിലേക്ക് മാറ്റി. ആക്രമണത്തെ ഛത്തീസ്ഗഢ് ആഭ്യന്തരമന്ത്രി അജയ് ചന്ദ്രാകര് അപലപിച്ചു. മാവോയിസ്റ്റുകളുടെ നിരാശയാണ് ആക്രമണത്തിലൂടെ പ്രതിഫലിക്കുന്നതെന്നും ചന്ദ്രാകര് കൂട്ടിച്ചേര്ത്തു.
