ട്വന്റി-20 കിരീട നേട്ടം, വെസ്റ്റ് ഇൻഡീസ് താരങ്ങൾക്ക്, തങ്ങളുടെ ക്രിക്കറ്റ് ബോർഡിനോടുളള മധുര പ്രതികാരം കൂടിയാണ്. ബോർഡിൽ നിന്നുളള കടുത്ത അവഗണനയ്ക്കിടെയാണ് കിരീടം എന്നത് വെസ്റ്റ് ഇൻഡീസിന്റെ വിജയത്തിന്റെ മാറ്റ് കൂട്ടുന്നു. ടീമിന്റെ പ്രതിഷേധം ക്യാപ്റ്റൻ ഡാരൻ സമി പരസ്യമായി പ്രകടിപ്പിക്കുകയും ചെയ്തു.
തികച്ചും വൈകാരികമായ രീതിയിലായിരുന്നു മത്സരശേഷം വെസ്റ്റ് ഇൻഡീസ് ക്യാപ്റ്റൻ ഡാരൻ സമി പ്രതികരിച്ചത്. തങ്ങളെ എല്ലാവരും അവഗണിച്ചു. ആരും തങ്ങൾക്ക് ഒരു അവസരം തന്നില്ല. വെസ്റ്റ് ഇൻഡീസ് ക്രിക്കറ്റ് ബോർഡ് പോലും ടീമിനെ നിരുത്സാഹപ്പെടുത്തുന്ന രീതിയിലാണ് പെരുമാറുന്നതെന്നും ഫൈനലിലെ വിജയത്തിനു ശേഷം സമി പറഞ്ഞു. ടീമിന് ധാരാളം പ്രശ്നങ്ങളുണ്ടായിരുന്നു. എന്നാൽ വെസ്റ്റ് ഇൻഡീസ് ക്രിക്കറ്റ് ബോർഡിൽ നിന്നുളള അവഗണനയാണ് ടീമിനെ കരുത്താർജിപ്പിച്ചതെന്നും സമി വ്യക്തമാക്കി.
ടീമിനെ അവഹേളിച്ച കളിയെഴുത്തുകാരൻ മാർക്ക് നിക്കോളാസിനേയും സമി വെറുതെ വിട്ടില്ല. വെസ്റ്റ് ഇൻഡീസ് ടീമിനെ തലച്ചോർ ഇല്ലാത്തവരെന്നാണ് നിക്കോളാസ് നേരത്തെ വിലയിരുത്തിയത്.
കരീബിയൻസിന് കിരീടം നേടിക്കൊടുത്ത ടീമംഗങ്ങളെ അഭിനന്ദിക്കാനും ക്യാപ്റ്റൻ മറന്നില്ല. അതിനിടെ പ്രതിസന്ധികൾക്കിടയിൽ നിന്നും, പറന്നുയർന്ന വെസ്റ്റ് ഇൻഡീസ് ടീമിനെ അഭിനന്ദിക്കാൻ സച്ചിൻ ടെൻഡുൽക്കർ അടക്കമുളളവർ രംഗത്തെത്തി.