ന്യൂഡൽഹി: ഒ.ബി.സി. വിഭാഗങ്ങൾക്കായുള്ള വിവിധ സർക്കാർ വിഭാഗങ്ങളിന്മേലുള്ള സംവരണത്തിനാവശ്യമായ നോൺ-ക്രീമിലെയർ സർട്ടിഫിക്കറ്റ് വ്യവസ്ഥകൾ ഉദാരമാക്കാൻ കേന്ദ്രസർക്കാർ ആലോചിക്കുന്നു. ഇനി മുതൽ, സ്വയം സാക്ഷ്യപ്പെടുത്തിയ നോൺ-ക്രീമിലെയർ സർട്ടിഫിക്കറ്റിന്റെ പകർപ്പു മാത്രം ഹാജരാക്കിയാൽ മതിയെന്നാണ് തീരുമാനം. ഇതു വഴി ആനുകൂല്യങ്ങൾക്കായി നിരവധി സർക്കാർ വകുപ്പുകളിൽ കയറിയിറങ്ങുകയും, നിസ്സാര കാരണങ്ങളിന്മേൽ ആനുകൂല്യങ്ങൾ നിഷേധിക്കപ്പെടുകയും ചെയ്യുന്ന സാഹചര്യം അപേക്ഷകർക്ക് ഒഴിവാകുകയാണ്.
വിവിധ കേന്ദ്രസർക്കാർ വകുപ്പുകളിലേയ്ക്കുള്ള നിയമനത്തിന്, ഒ ബി സി സംവരണം ലഭ്യമാകുവാൻ, നോൺ-ക്രീമിലെയർ സർട്ടിഫിക്കറ്റ് ആവശ്യമാണ്. ഇതു സംബന്ധിച്ച് കേന്ദ്ര സാമൂഹ്യനീതി മന്ത്രാലയം, ഉന്നതവിദ്യാഭ്യാസ വകുപ്പ്, യു.പി.എസ്.സി. തുടങ്ങിയ വിവിധ വകുപ്പുകളുടെ വിദഗ്ധോപദേശം തേടിയിരുന്നു. കേന്ദ്ര പിന്നാക്ക വിഭാഗ കമ്മീഷന്റെയും വിദഗ്ധോപദേശം പരിഗണിച്ചു കൊണ്ടാണ് പുതിയ നിയമം പ്രാബല്യത്തിൽ വരുന്നത്.
