തിരുവനന്തപുരം: സംസ്ഥാനത്ത് വൈദ്യുതി ഉപഭോഗം ഉയർന്ന നിലയിൽ തുടരുന്നതിനിടെ പീക്ക് സമയത്ത് വൈദ്യുതി ഉപയോഗത്തിൽ നിയന്ത്രണം പാലിക്കാൻ കെഎസ്ഇബി നിർദേശം നൽകി. സർക്കാർ ഓഫീസുകളിലും വൈദ്യുതി ഉപഭോഗം കുറയ്ക്കണമെന്ന് നിർദേശിച്ചിട്ടുണ്ട്.
എസിയുടെ താപനില 25 ഡിഗ്രി സെൽഷ്യസിന് മുകളിൽ ക്രമീകരിക്കണം. അനാവശ്യ ദീപാലങ്കാരങ്ങളും പ്രകാശ സംവിധാനങ്ങളും ഒഴിവാക്കണമെന്നും നിർദേശമുണ്ട്. പമ്പിങ് പ്രവർത്തനങ്ങൾ പകൽ സമയത്ത് നടത്താനും ഊർജം കൂടുതൽ ആവശ്യമുള്ള വ്യവസായ സ്ഥാപനങ്ങളുടെ പ്രവർത്തനങ്ങൾ പകൽ സമയത്തേക്ക് ക്രമീകരിക്കാനും നിർദേശിച്ചിട്ടുണ്ട്.
അതിനിടെ VEH ഗ്ലോബൽ ഇന്ത്യ പ്രൈവറ്റ് ലിമിറ്റഡിൽ നിന്ന് 200 മെഗാവാട്ട് അധിക വൈദ്യുതി ലഭ്യമാക്കുന്നുണ്ട്. വൈകിട്ട് ആറുമണി മുതൽ രാത്രി 12 വരെയുള്ള പീക്ക് സമയത്താണ് വൈദ്യുതി ലഭിക്കുക. ഒക്ടോബർ 31 വരെ യൂണിറ്റിന് 11 രൂപ നിരക്കിലാണ് വൈദ്യുതി വാങ്ങുന്നത്.
മഴക്കുറവും ഉയർന്ന അന്തരീക്ഷ താപനിലയും കാരണം വൈദ്യുതി ഉപഭോഗം ഉയർന്ന നിലയിൽ തുടരുകയാണെന്നാണ് കെഎസ്ഇബി വ്യക്തമാക്കിയത്. മുൻ വർഷങ്ങളിലെ സെപ്റ്റംബർ മാസത്തെ ആവശ്യകതയെ അപേക്ഷിച്ച് ഇത്തവണ ഡിമാൻഡ് ഏകദേശം 1200 മെഗാവാട്ട് വരെ ഉയർന്നതായും കെഎസ്ഇബി അറിയിച്ചു.
ദേശീയ തലത്തിലും വൈദ്യുതി ലഭ്യതയിലെ കുറവ് തുടരുന്ന സാഹചര്യമാണ്. പീക്ക് സമയത്തെ ഗ്രിഡ് ഫ്രീക്വൻസിയിലും കുറവ് രേഖപ്പെടുത്തിയതായി കെഎസ്ഇബി അറിയിച്ചു.
