ഐപിഎല്ലിൽ പൂനെ സൂപ്പർ ജയിന്‍റ്സിനെതിരെ ഗുജറാത്ത് ലയൺസിന് ഏഴ് വിക്കറ്റ് വിജയം. ആദ്യം ബാറ്റ് ചെയ്ത പൂനെ സൂപ്പർ ജയിന്‍റ്സ്, നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 163 റൺസ് നേടി. 69 റൺസ് സ്വന്തമാക്കിയ ഡ്യൂപ്ലെസിസാണ് പൂനെയുടെ ടോപ്പ് സ്കോറർ. കെവിൻ പീറ്റേഴ്സൺ 37 റൺസ് എടുത്തു. ഗുജറാത്ത് ലയൺസിനായി പ്രവീൺ താംബെയും, രവീന്ദ്ര ജഡേജയും രണ്ടുവിക്കറ്റ് വീതം സ്വന്തമാക്കി.
മറുപടി ബാറ്റിംഗ് ആരംഭിച്ച ഗുജറാത്ത് ലയൺസിനായി ഓപ്പണർമാരായ ആരോൺ ഫിഞ്ചും, ബ്രണ്ടൻ മക്കല്ലവും ചേർന്ന് മികച്ച തുടക്കം നല്കി. ഫിഞ്ച്-മക്കല്ലം സഖ്യം 8.3 ഓവറിൽ 85 റൺസാണ് അടിച്ചുക്കൂട്ടിയത്. ഫിഞ്ച് 50ഉം, മക്കല്ലം 49 റൺസും നേടി പുറത്തായി. 10 പന്തിൽ 22 റൺസ് നേടിയ ഡ്വയൻ ബ്രാവോയുടെ മികവിൽ 18 ഓവറിൽ ഗുജറാത്ത് ലക്ഷ്യം കണ്ടു.
ഇന്നു നടക്കുന്ന മത്സരത്തിൽ, ഡൽഹി ഡെയർ ഡെവിൾസ്, കിംഗ്സ് ഇലവൻ പഞ്ചാബിനെ നേരിടും.
