യംഗ് ജനറേഷനെ ലക്ഷ്യമിട്ടുള്ള ബജാജിന്റെ പുതിയ ബൈക്ക് പൾസർ സി എസ് 400 ഈ മാസം പുറത്തിറക്കും . കമ്പനി മേധാവി രാജീവ് ബജാജാണ് സിഎസ് 400 ന്റെ വരവ് ഈ മാസമുണ്ടാകുമെന്ന് അറിയിച്ചത് . 2014 ലെ ഇന്ത്യൻ ഓട്ടോ എക്സ്പോയിൽ വാഹന പ്രേമികളുടെ മനം കവർന്ന സിഎസ് 400 ഏറെക്കാലത്തെ കാത്തിരിപ്പിന് ശേഷമാണ് പുറത്ത് വരുന്നത് .
ക്രൂയിസർ സ്പോർട്സ് എന്നതിന്റെ ചുരുക്കെഴുത്താണ് സി എസ് . പൾസർ 200 എൻ എസിന്റെ പിൻഗാമിയായാണ് എത്തുന്നതെങ്കിലും തീർത്തും വ്യത്യസ്തനാണ് സിഎസ് 400. പിറകിലേക്ക് വലിഞ്ഞു നിൽക്കുന്ന പെട്രോൾ ടാങ്കാണ് പ്രധാന വ്യത്യാസം . നഗരങ്ങളിലെ അലസഗമനമല്ല ചീറിപ്പായാൻ തന്നെയാണ് സിഎസ് 400 ന്റെ തയ്യാറെടുപ്പ് . അതിനു അനുയോജ്യമായ രീതിയിലാണ് ഡിസൈനും.
35-40 ബിഎച്ച്പി പവർ സൃഷ്ടിക്കാൻ കഴിയുന്ന 373.2 സിസി ഫോർ സ്ട്രോക്ക് സിംഗിൾ സിലിൻഡറാണ് എഞ്ചിൻ . വേഗതയുടെ സൂചി അങ്ങേയറ്റം 175 കിലോമീറ്ററിലെത്തും. ടെലിസ്കോപ്പിക് ഫ്രണ്ട് ഫോർക്കിനൊപ്പം പിറകിൽ മോണോഷോക്ക് സസ്പെൻഷനാണ് . ഹാൻഡിലിലും ടാങ്കിലുമായാണ് ഡിജിറ്റൽ മീറ്ററുകൾ ഉറപ്പിച്ചിരിക്കുന്നത് . എല്ലാ മീറ്ററുകളും ഡിജിറ്റലായ ബജാജിന്റെ ആദ്യ ബൈക്കാണെന്ന പ്രത്യേകതയും സി എസ് 400 നുണ്ട് .
1.5 ലക്ഷം മുതൽ 1.8 ലക്ഷം വരെയാണ് സി എസിന്റെ വില പ്രതീക്ഷിക്കുന്നത് .
