റാഞ്ചി: ഝാര്ഖണ്ഡിലെ ഇടതുതീവ്രവാദ ശൃംഖലയ്ക്ക് വന് തിരിച്ചടിയായി സിപിഐ (മാവോയിസ്റ്റ്) സംഘടനയുടെ ഉന്നത നേതാവായ അജയ് മഹ്തോ അഥവാ മോച്ചു അഥവാ ടൈഗര് അറസ്റ്റില്. ഗിരിഡിഹ് പോലീസും സിആര്പിഎഫും സംയുക്തമായി നടത്തിയ പ്രത്യേക ഓപ്പറേഷനിലാണ് പ്രത്യേക ഏരിയ കമ്മിറ്റി അംഗമായ ഇയാളെ പിടികൂടിയത്. അജയ് മഹ്തോയുടെ തലയ്ക്ക് 25 ലക്ഷം രൂപ പാരിതോഷികം പ്രഖ്യാപിച്ചിരുന്നതായി അധികൃതര് അറിയിച്ചു.
ജൂലൈ 17-ന് ഗിരിഡിഹ് ജില്ലയിലെ ഖുഖ്ര പൊലീസ് സ്റ്റേഷന് പരിധിയിലെ ഹര്ലാഡിഹ് വനമേഖലയില് മാവോയിസ്റ്റ് സാന്നിധ്യമുണ്ടെന്ന രഹസ്യവിവരം പോലീസിന് ലഭിച്ചിരുന്നു. തുടര്ന്ന് ഗിരിഡിഹ് എസ്.പി ബിമല് കുമാറിന്റെയും കോബ്ര 209 ബറ്റാലിയന് കമാന്ഡന്റ് സൗരഭ് ഭട്നാഗറിന്റെയും നേതൃത്വത്തില് പ്രത്യേക തിരച്ചില് ആരംഭിച്ചു. പിപ്രാദിഹ് ഗ്രാമത്തിന് സമീപമുള്ള വനമേഖല വളഞ്ഞ സുരക്ഷാസേന, രക്ഷപ്പെടാന് ശ്രമിക്കുന്നതിനിടെയാണ് അജയ് മഹ്തോയെ പിടികൂടിയത്.
2005 മുതല് മാവോയിസ്റ്റ് പ്രവര്ത്തനങ്ങളില് സജീവമായിരുന്ന മഹ്തോ, പരസ്നാഥ് മേഖലയിലെ ഏരിയ കമാന്ഡറായും പ്രവര്ത്തിച്ചിട്ടുണ്ട്. കഴിഞ്ഞ രണ്ട് പതിറ്റാണ്ടായി ഝാര്ഖണ്ഡിലെ വിവിധ ജില്ലകളില് മാവോയിസ്റ്റ് പ്രവര്ത്തനങ്ങള്ക്ക് നേതൃത്വം നല്കിയിരുന്ന പ്രധാന നേതാക്കളില് ഒരാളായിരുന്നുവെന്നാണ് പോലീസ് പറയുന്നത്. കൊലപാതകം, ഐഇഡി സ്ഫോടനം, സുരക്ഷാസേനയ്ക്ക് നേരെയുള്ള പതിയിരുന്നാക്രമണം, സര്ക്കാര് സ്വത്ത് നശിപ്പിക്കല് തുടങ്ങി 240-ലധികം കേസുകളാണ് ഇയാള്ക്കെതിരെ രജിസ്റ്റര് ചെയ്തിട്ടുള്ളത്.
അജയ് മഹ്തോയുടെ അറസ്റ്റ് മാവോയിസ്റ്റ് ശൃംഖലയ്ക്ക് വലിയ തിരിച്ചടിയാണെന്നും, മേഖലയിലെ സമാധാനവും വികസന പ്രവര്ത്തനങ്ങളും കൂടുതല് ശക്തിപ്പെടുത്താന് ഇത് സഹായിക്കുമെന്നും ഗിരിഡിഹ് പൊലീസ് വ്യക്തമാക്കി. അതേസമയം, മാവോയിസ്റ്റ് പ്രവര്ത്തകര് ആയുധം ഉപേക്ഷിച്ച് കീഴടങ്ങി സര്ക്കാരിന്റെ പുനരധിവാസ പദ്ധതിയുടെ ആനുകൂല്യം പ്രയോജനപ്പെടുത്തി മുഖ്യധാരയിലേക്ക് മടങ്ങിവരണമെന്നും ഗിരിഡിഹ് എസ്.പി ആഹ്വാനം ചെയ്തു.
