പത്തനംതിട്ട: ശബരിമല പ്രത്യേക ഡ്യൂട്ടിക്കിടെ ഫയര്ഫോഴ്സ് വാഹനം നിയന്ത്രണംവിട്ട് മറിഞ്ഞുണ്ടായ അപകടത്തില് അഗ്നിരക്ഷാ സേനാ ഉദ്യോഗസ്ഥന് മരിച്ചു. തിരുവല്ല അഗ്നിരക്ഷാ നിലയത്തിലെ ഫയര് ആന്ഡ് റെസ്ക്യൂ ഓഫീസര് രഞ്ജിത്ത് കുമാര് (39) ആണ് മരിച്ചത്. കൊല്ലം ആയൂര് സ്വദേശിയാണ്. പത്തനംതിട്ട ജില്ലയിലെ തുലാപ്പള്ളി-ആലപ്പാട് ജംഗ്ഷനില് വെച്ചായിരുന്നു അപകടം. ശബരിമലയില് പ്രത്യേക ഡ്യൂട്ടിയിലുണ്ടായിരുന്ന ഫയര്ഫോഴ്സ് വാഹനം നിയന്ത്രണംവിട്ട് റോഡരികില് പാര്ക്ക് ചെയ്തിരുന്ന വാഹനങ്ങളിലേക്ക് ഇടിച്ചുകയറി തുടര്ന്ന് മറിയുകയായിരുന്നു.
അപകടത്തില് തമിഴ്നാട്ടില് നിന്ന് ശബരിമല ദര്ശനത്തിനെത്തിയ തീര്ഥാടകരുടെ വാഹനം പൂര്ണമായും തകര്ന്നു. കൂടാതെ വനംവകുപ്പിന്റെ വാഹനത്തിലും മറ്റൊരു ജീപ്പിലും ഫയര്ഫോഴ്സ് വാഹനം ഇടിച്ചു. അപകടസമയത്ത് പാര്ക്ക് ചെയ്തിരുന്ന വാഹനങ്ങളില് ആളുകളില്ലാതിരുന്നതിനാല് വലിയ ദുരന്തമാണ് ഒഴിവായത്. അല്ലാത്തപക്ഷം നിരവധി പേര്ക്ക് അപകടത്തില്പ്പെടാനുള്ള സാധ്യതയുണ്ടായിരുന്നുവെന്നാണ് പ്രാഥമിക വിലയിരുത്തല്. അപകടകാരണം സംബന്ധിച്ച് പൊലീസ് അന്വേഷണം ആരംഭിച്ചിട്ടുണ്ട്.
