റിയോ: അടുത്ത ഒളിമ്പിക്സില് സ്വര്ണവുമായി മടങ്ങും. ഇത് ഇന്ത്യക്കാര്ക്ക് ദീപ കര്മാക്കര് നല്കുന്ന ഉറപ്പാണ്. തീവ്രപരിശീലനത്തിന്റെയും മെയ്വഴക്കത്തിന്റെയും പേടിപ്പെടുത്തുന്ന കഥകള് ഇന്ത്യന് താരങ്ങളെ അകറ്റിനിര്ത്തിയിരുന്ന ജിംനാസ്റ്റിക്സില് ഭാരതത്തിന്റെ അഭിമാനമായി മാറിയ ഇരുപത്തിരണ്ടുകാരി. റിയോയില് പ്രതീക്ഷിച്ച മെഡല്നേട്ടം കൈവരിക്കാനായില്ലെങ്കിലും ദീപ കര്മാക്കറിനെപ്പോലുളള പ്രതിഭകളുടെ ഉദയം ഇന്ത്യന് കായികലോകത്തിന് നല്കുന്ന ശുഭപ്രതീക്ഷകള് ചെറുതല്ല.
ജിംനാസ്റ്റിക്സിലെ വോള്ട്ട് ഫൈനലില് നാലാം സ്ഥാനത്താണ് ദീപ ഫിനീഷ് ചെയ്തത്. എന്നാല് ദീപയുടെ നാലാം സ്ഥാനം മെഡല്നേട്ടത്തേക്കാള് തിളക്കം നിറഞ്ഞതാണ്. ചൈനയുടെയും റഷ്യയുടെയുമൊക്കെ താരങ്ങള് മെയ്വഴക്കം കൊണ്ട് വിസ്മയം സൃഷ്ടിച്ച കായിക ഇനത്തില് ഇന്ത്യയ്ക്ക് അഭിമാനപൂര്വ്വം ഇനി ദീപയുടെ പേരും ഉയര്ത്തിക്കാട്ടാം.
റിയോയില് മെഡല് നേടാനാകാത്തത് തന്റെ ഹൃദയം തകര്ത്തുവെന്ന് പറഞ്ഞുകൊണ്ടായിരുന്നു 2020 ടോക്കിയോ ഒളിമ്പിക്സില് തന്റെ മടക്കം സ്വര്ണവുമായിട്ടായിരിക്കുമെന്ന് ദീപ വാക്ക് നല്കുന്നത്. യോഗ്യതാ റൗണ്ടില് എട്ടാം സ്ഥാനക്കാരിയായി ഫൈനലില് എത്തിയിട്ടും അതിന്റെ പരിഭ്രമങ്ങള് ഒന്നുമില്ലാതെയാണ് ദീപ മത്സരിച്ചത്. നഷ്ടപ്പെടാന് ഒന്നുമില്ലാത്തതിന്റെ ആത്മവിശ്വാസം ആ ത്രിപുരക്കാരിക്ക് അക്ഷരാര്ഥത്തില് കരുത്ത് പകരുകയായിരുന്നു. ആ കരുത്തില് നിന്ന് തന്നെയാണ് ടോക്കിയോയില് 2020 ല് സ്വര്ണവുമായി മടങ്ങുമെന്ന് ദീപ ആത്മവിശ്വാസത്തോടെ പറയുന്നതും.
പരിശീലനഘട്ടത്തില് പഠിച്ചതൊക്കെ റിയോയില് താന് പ്രയോഗികമാക്കിയതായി ദീപ പറഞ്ഞു. തന്റെ പ്രകടനവും മികച്ചതായിരുന്നു. എന്നാല് മെഡല് നേടാന് കഴിഞ്ഞില്ല. വിജയം പോലെ തന്നെ കായികരംഗം പരാജയത്തിന്റേത് കൂടിയാണെന്ന് ദീപ പറയുന്നു. റിയോയിലെ പാഠം ഉള്ക്കൊണ്ട് പരിശീലനത്തില് കൂടുതല് ശ്രദ്ധകേന്ദ്രീകരിക്കാനാണ് ദീപയുടെ തീരുമാനം. ഒപ്പം തന്നെ ഏറെ പ്രോത്സാഹിപ്പിച്ച പരിശീലകനും ജിംനാസ്റ്റിക്സ് ഫെഡറേഷന് ഓഫ് ഇന്ത്യയ്ക്കും സ്പോര്ട്സ് അസോസിയേഷന് ഓഫ് ഇന്ത്യയ്ക്കും നിറഞ്ഞ വാക്കുകളോടെ ദീപ നന്ദി പറഞ്ഞു.
0.150 പോയിന്റുകള്ക്കാണ് അഗര്ത്തല സ്വദേശിനിയായ ദീപയ്ക്ക് വെങ്കല മെഡല് നഷ്ടമായത്. എട്ട് പേര് മത്സരിച്ച ഫൈനലില് 15.066 പോയിന്റുകള് നേടിയാണ് ദീപ നാലാം സ്ഥാനത്ത് എത്തിയത്. ഒളിമ്പിക്സ് ജിംനാസ്റ്റിക്സില് മത്സരിക്കുന്ന ഇന്ത്യയുടെ ആദ്യ വനിതാ താരമാണ് ദീപ. ഭാരതത്തില് നിന്നുളള കായികതാരങ്ങള്ക്ക് ജിംനാസ്റ്റിക്സ് എന്നും ഒരു ബാലികേറാമലയായിരുന്നു. ഇതാണ് ദീപ കര്മാക്കര് തിരുത്തിയെഴുതിയത്.
