സൂപ്പർ താരം ലയണൽ മെസ്സിക്കെതിരെ ഫുട്ബോൾ ഇതിഹാസം ഡീഗോ മറഡോണ. കോപ്പ അമേരിക്കയിൽ വിരമിക്കലിലൂടെ മെസ്സി നാടകം കളിച്ചതാണെന്ന വിമർശനവുമായാണ് മറഡോണ രംഗത്തെത്തിയത്.
കോപ്പ അമേരിക്ക ഫുട്ബോൾ ഫൈനലിൽ അർജന്റീന ചിലിയോട് തോറ്റതിന് പിന്നാലെയാണ് ക്യാപ്റ്റൻ ലയണൽ മെസ്സി ദേശീയ ടീമിൽ നിന്നുള്ള വിരമിക്കൽ പ്രഖ്യാപിച്ചത്. കോച്ച് എഡ്ഗാർഡോ ബോസയുമായി ചർച്ച നടത്തിയ ശേഷം മെസി തിരിച്ചുവരുന്ന കാര്യം പരിശോധിക്കുകയാണെന്ന വാർത്തകളുണ്ടായിരുന്നു.
മെസ്സി മടങ്ങി വരണമെന്ന് ഫുട്ബോൾ ആരാധകർക്കിടയിൽ നിന്ന് നിരന്തരം ആവശ്യമുയരുന്നതിനിടെയാണ് മെസ്സിക്കെതിരെ ആരോപണവുമായി ഫുട്ബോൾ ഇതിഹാസം ഡീഗോ മറഡോണ രംഗത്തെത്തുന്നത്. മെസ്സി വിരമിക്കലിലൂടെ നടത്തിയത് നാടകമാണെന്ന് മറഡോണ ആരോപിക്കുന്നു. വിമർശനങ്ങളിൽ നിന്ന് രക്ഷപ്പെടാനാണ് മെസ്സി വിരമിക്കലിലൂടെ ശ്രമിച്ചത്. വിരമിക്കൽ പ്രഖ്യാപനം അർജന്റീനക്കാരെ ഒരു പക്ഷെ തോൽവിയുടെ ഭാരത്തിൽ നിന്ന് ശ്രദ്ധതിരിച്ചിരിക്കാമെന്നും മറഡോണ പറയുന്നു.
ഇതാദ്യമായല്ല മറഡോണ മെസ്സിക്കെതിരെ പരസ്യമായി രംഗത്തെത്തുന്നത്. കോപ്പ അമേരിക്ക ടൂർണമെന്റിൽ മെസ്സിയുടെ കീഴിൽ അർജന്റീനയിറങ്ങുന്നതിനെയും മറഡോണ വിമർശിച്ചിരുന്നു. മെസ്സി ഒരു പക്ഷെ വലിയ മനുഷ്യനാകാമെന്നും എന്നാൽ അദ്ദേഹത്തിന് നേതൃപാഠവമില്ലെന്നും മറഡോണ ആരോപിച്ചിരുന്നു.
സ്പാനിഷ് ലീഗ് ഫുട്ബോളിൽ സെൽറ്റാ വിഗായ്ക്കെതിരെ പെനാൽറ്റി പാഴാക്കിയപ്പോഴും 2014 ലോകകപ്പിൽ മെസിയെ മികച്ച കളിക്കാരനായി തെരഞ്ഞെടുത്തപ്പോഴും ഇതിഹാസ താരം സൂപ്പർതാരത്തിനെതിരെ വിമർശനവുമായി രംഗത്തെത്തിയിരുന്നു.
