കോഴിക്കോട്: പാകിസ്ഥാനുമായുളള ക്രിക്കറ്റ് മത്സരം പുനരാരംഭിക്കുകയെന്നത് സമീപകാലത്ത് സാദ്ധ്യമല്ലെന്ന് ബിസിസിഐ. ഉറിയിലെ ഭീകരാക്രമണത്തിന്റെ പശ്ചാത്തലത്തില്‍ മാദ്ധ്യമപ്രവര്‍ത്തകരുടെ ചോദ്യങ്ങളോട് പ്രതികരിക്കവേയാണ് ബിസിസിഐ അധ്യക്ഷന്‍ അനുരാഗ് ഠാക്കൂര്‍ ഇക്കാര്യം വ്യക്തമാക്കിയത്. ബിജെപി ദേശീയ കൗണ്‍സില്‍ യോഗത്തില്‍ പങ്കെടുക്കാന്‍ കോഴിക്കോട് എത്തിയതായിരുന്നു യുവമോര്‍ച്ച ദേശീയ അദ്ധ്യക്ഷന്‍ കൂടിയായ അദ്ദേഹം.
അത്തരം ഒരു ചിന്തപോലും ഇപ്പോള്‍ ഉചിതമാകില്ലെന്ന് അദ്ദേഹം പറഞ്ഞു. പാകിസ്ഥാന്റെ ഭീകരവാദ അനുകൂല നിലപാട് പുറത്തു കൊണ്ടുവരികയാണ് പ്രധാനം. ഈ സാഹചര്യത്തില്‍ ഇരുരാജ്യങ്ങളും തമ്മില്‍ ക്രിക്കറ്റ് കളിക്കുന്നതിന് പ്രസക്തിയില്ല. ഇക്കൊല്ലം പാകിസ്ഥാനുമായി ഇന്ത്യന്‍ ക്രിക്കറ്റ് ടീം മത്സരങ്ങള്‍ ഒന്നും ഷെഡ്യൂള്‍ ചെയ്തിട്ടില്ലെന്നും അദ്ദേഹം പറഞ്ഞു.
2012 ലാണ് ഇന്ത്യയും പാകിസ്ഥാനും അവസാനമായി ക്രിക്കറ്റ് പരമ്പര കളിച്ചത്. മുംബൈ ഭീകരാക്രമണത്തിന് ശേഷം മുടങ്ങിയ മത്സരം പുനരാരംഭിക്കുന്നതിന്റെ തുടക്കമായിട്ടായിരുന്നു ഇതിനെ വിശേഷിപ്പിച്ചിരുന്നത്. എന്നാല്‍ തുടര്‍ന്നും ഭീകരാക്രമണങ്ങള്‍ ഉണ്ടാവുകയും അതില്‍ പാകിസ്ഥാന്റെ പങ്ക് കൂടുതല്‍ വ്യക്തമാകുകയും ചെയ്തതോടെ ഇന്ത്യ നിലപാട് പുനപ്പരിശോധിക്കുകയായിരുന്നു.
