ധർമ്മശാല: ഇന്ത്യ ന്യൂസിലൻഡ് ഏകദിന പരമ്പരയ്ക്ക് ഇന്ന് തുടക്കമാകും. ധർമ്മശാലയിൽ ഉച്ചയ്ക്ക് 1.30നാണ് മത്സരം. ഇന്ത്യയുടെ 900 ആമത് മത്സരത്തിനാണ് ഇന്ന് ആഥിതേയർ ഇറങ്ങുന്നത്.
ടെസ്റ്റ് പരമ്പര തൂത്ത് വാരിയതിന്റെ ആത്മവിശ്വാസവുമായാണ് ടീം ഇന്ത്യ ഏകദിന പരമ്പരയ്ക്കായി ഇറങ്ങുന്നത്. അഞ്ച് മത്സരങ്ങൾ അടങ്ങുന്ന പരമ്പര സ്വന്തമാക്കി ഏകദിന റാങ്കിങ്ങിൽ നില മെച്ചപ്പെടുത്തുക എന്നതാണ് ധോണിയുടെയും സംഘത്തിന്റെയും ലക്ഷ്യം.
ഇന്ത്യയുടെ 900 മത്സരമാണ് ധർമശാലയിലേത്. അതുകൊണ്ട് തന്നെ ജയത്തിൽ കുറഞ്ഞതൊന്നും ആതിഥേയർ ലക്ഷ്യം വയ്ക്കുന്നില്ല.
എന്നാൽ ടെസ്റ്റ് ടീമിൽ നിന്ന് ഏറെ മാറ്റങ്ങളോടെയാണ് ഇന്ത്യ ഇറങ്ങുന്നത്. ടെസ്റ്റിൽ ന്യൂസിലാൻഡിനെ ചുഴറ്റിയെറിഞ്ഞ അശ്വിനും ജഡേജയ്ക്കും ഷാമിക്കും വിശ്രമം അനുവദിച്ചിട്ടിച്ചുണ്ട്.
അതേസമയം ടെസ്റ്റ് പരമ്പരയിലേറ്റ സമ്പൂർണ്ണ പരാജയത്തിന് മറുപടി നൽകുമെന്ന പ്രഖ്യാപനവുമായാണ് വില്യംസണും കൂട്ടരും ഇറങ്ങുന്നത്. ടെസ്റ്റ് പരാജയം മറന്നു കഴിഞ്ഞെന്നും ഇന്ത്യയിൽ പരമ്പര സ്വന്തമാക്കിയിട്ടില്ലെന്ന നാണക്കേട് തിരുത്തുമെന്നുമാണ് കിവികൾ പറയുന്നത്.
പരിക്കിനെ തുടർന്ന് വിശ്രമത്തിലായിരുന്ന കോറി ആൻഡേഴ്സണും ടീം സൗത്തിയും മടങ്ങിയെത്തുന്നതും കിവികൾക്ക് ആത്മവിശ്വാസമേകുന്നതാണ്.ബറ്റിങ്ങിനെ തുണയ്ക്കുന്ന ധർമ്മശാലയിൽ ടോസ് നിർണ്ണായകമാകും.
ജയം തുടരാൻ ആതിഥേയരും പരാജയത്തിൽ നിന്ന് വിജയവഴിയിലേക്ക് തിരിച്ചു വരാൻ സന്ദർശകരും കച്ചകെട്ടിയിറങ്ങുമ്പോൾ ധർമ്മശാലയിൽ തീപാറുമെന്നുറപ്പ്.
