വിശാഖപട്ടണം: ടെസ്റ്റ് ക്രിക്കറ്റിന് പിന്നാലെ ഏകദിന പരമ്പരയും ഇന്ത്യയ്ക്ക്. വിശാഖപട്ടണ ഏകദിനത്തിൽ ന്യൂസിലൻഡിനെ 190 റൺസിന് കീഴടക്കിയാണ് പരമ്പര ടീം ഇന്ത്യ 3-2 ന് സ്വന്തമാക്കിയത്. അഞ്ച് വിക്കറ്റെടുത്ത അമിത് മിശ്രയാണ് വിജയശിൽപി.
ഇന്ത്യൻ മണ്ണിൽ ആദ്യ പരമ്പര എന്ന ചരിത്രം രചിക്കാൻ കെയ്ൻ വില്യംസണും സംഘത്തിനുമായില്ല. അമിത് മിശ്രയുടെ സ്പിൻ മികവിനുമുന്നിൽ കീവിസ് നിലംതൊട്ടു. 270 റൺസ് വിജയലക്ഷ്യം പിന്തുടർന്ന കീവിസ് ബാറ്റിംഗ് നിര 79 റൺസുമായി കൂടാരം കയറി. ഇന്ത്യയ്ക്ക് 190 റൺസിന്റെ വിജയം സമ്മാനിച്ച്.
14 ഓവറിൽ രണ്ട് വിക്കറ്റിന് 62 എന്ന നിലയിൽ നിന്നും 17 റൺസ് കൂട്ടിചേർക്കുന്നതിനിടെ കീവിസ് ബാറ്റിംഗ് നിര തകർന്നടിഞ്ഞു. 18 റൺസ് വഴങ്ങി 5 വിക്കറ്റെടുത്ത അമിത് മിശ്രയാണ് കീവിസിന്റെ ചിറകരിഞ്ഞത്. മിശ്രയാണ് കളിയിലേയും പരമ്പരയിലേയും താരം.
അരങ്ങേറ്റക്കാരൻ ജയന്ത് യാദവ് ഉൾപ്പടെ ശേഷിക്കുന്ന വിക്കറ്റുകൾ പങ്കിട്ടു. ടോസ് നേടി ആദ്യം ബാറ്റ് ചെയ്ത ഇന്ത്യ രോഹിത് ശർമയും വിരാട് കൊഹ്ലിയും നേടിയ അർദ്ധ സെഞ്ച്വറികളുടെ മികവിലാണ് മികച്ച സ്കോർ കണ്ടെത്തിയത്.
