ന്യൂഡല്ഹി: ഇറാന് വേദിയാകുന്ന ഏഷ്യന് ഷൂട്ടിംഗ് ചാമ്പ്യന്ഷിപ്പില് നിന്നും ഇന്ത്യന് താരം ഹീന സിദ്ദു പിന്മാറി. ചാമ്പ്യന്ഷിപ്പില് പങ്കെടുക്കുന്ന വനിതാ അത്ലറ്റുകള്ക്ക് ഹിജാബ് നിര്ബന്ധമാക്കിയതാണ് ഒളിമ്പ്യന് ഹീന സിദ്ദുവിന്റെ പിന്മാറ്റത്തിന് കാരണം. ഇതു സംബന്ധിച്ച് ദേശീയ റൈഫിള് അസോസിയേഷന് ഹീന കത്ത് കൈമാറിക്കഴിഞ്ഞു.
ഈ ഡിസംബറില് ഇറാന് തലസ്ഥാനമായ ടെഹ്റാനില് നടക്കാനിരുന്ന മത്സരത്തില് നിന്നാണ് ഹീനയുടെ പിന്മാറ്റം. വനിതാ അത്ലറ്റുകള് ഹിജാബ് ധരിക്കണമെന്ന അധികൃതരുടെ നിലപാട് അംഗീകരിക്കാനാകില്ലെന്നും കായിക മേഖലയുടെ അന്തസത്തയ്ക്ക് ചേരുന്നതല്ല ഇത്തരം തീരുമാനങ്ങളെന്നും ചൂണ്ടിക്കാട്ടിയാണ് മത്സരിക്കാനില്ലെന്ന് ഹീന വ്യക്തമാക്കിയത്. ഭാഷ, വേഷം, മതം, സംസ്കാരം എന്നിവയ്ക്ക് അതീതമാണ് കായികമേഖലയെന്നും ഇവിടെ പ്രതിഫലിക്കേണ്ടത് കഴിവ് മാത്രമാണെന്നും ഹീന വ്യക്തമാക്കുന്നു. പിന്മാറ്റത്തിന്റെ കാരണം ചൂണ്ടിക്കാട്ടി റൈഫിള് അസോസിയേഷന് ഹീന സിദ്ദു കത്തും കൈമാറി.
തന്റെ തീരുമാനം വ്യക്തിപരമാണെന്നും ഇത് രാഷ്ട്രീയ വിവാദമാക്കരുതെന്നും താരം സോഷ്യല് മീഡിയയിലൂടെ അറിയിച്ചിട്ടുണ്ട്. ഇത്തവണത്തെ റിയോ ഒളിംപിക്സില് 10 മീറ്റര് എയര് പിസ്റ്റളില് ഇന്ത്യയെ പ്രതിനിധീകരിച്ച് ഹീന പങ്കെടുത്തിരുന്നു. മുന്പും ഇറാനില് വച്ച് നടന്ന മത്സരത്തിന് ഹിജാബ് നിര്ബന്ധമാക്കിയതിനെതിരെ ഹീന പ്രതിഷേധവുമായി രംഗത്തു വന്നിട്ടുണ്ട്. അതേസമയം മതപരമായ ആചാരങ്ങള് അഥിതികളില് അടിച്ചേല്പ്പിക്കുന്നതിന്റെ പേരില് ഇറാന് മുന്പും വിമര്ശന വിധേയമായിട്ടുണ്ട്.
