കൊച്ചി: മലയാളിതാരം സി.കെ വിനീതിന്റെ ഇരട്ടഗോളില് ഐഎസ്എല്ലില് ചെന്നൈയിന് എഫ്സിക്കെതിരായ മത്സരത്തില് ബ്ലാസ്റ്റേഴ്സിന് തകര്പ്പന് ജയം. ഒന്നിനെതിരെ മൂന്ന് ഗോളുകള്ക്കാണ് ബ്ലാസ്റ്റേഴ്സ് സ്വന്തം തട്ടകത്തില് എതിരാളികളെ തകര്ത്തത്.
85-ാം മിനിറ്റിലും 88-ാം മിനിറ്റിലുമാണ് വിനീത് ബ്ലാസ്റ്റേഴ്സിനായി സ്കോര് ചെയ്തത്. 22-ാം മിനിറ്റില് ബെര്ണാഡ് മെന്ഡിയിലൂടെ ചെന്നൈയിന് എഫ്സി മുന്നിലെത്തിയിരുന്നു. തുടര്ന്ന് എതിരാളികള് നിരന്തരം ആക്രമണം അഴിച്ചുവിട്ടതോടെ ബ്ലാസ്റ്റേഴ്സിന് കളിയുടെ താളം വീണ്ടെടുക്കാനായില്ല.
എന്നാല് രണ്ടാം പകുതിയില് ഓരോ നിമിഷവും ബ്ലാസ്റ്റേഴ്സ് കളി കാല്ക്കീഴില് ഒതുക്കുകയായിരുന്നു. 66-ാം മിനിറ്റില് ദിദിയര് കാഡിയനിലൂടെ ബ്ലാസ്റ്റേഴ്സ് സമനില പിടിച്ചു.
ഇതോടെ 15 പോയിന്റുമായി ബ്ലാസ്റ്റേഴ്സ് രണ്ടാം സ്ഥാനത്തെത്തി. ഹോം ഗ്രൗണ്ടില് ബ്ലാസ്റ്റേഴ്സ് തുടര്ച്ചയായ രണ്ടാം ജയമാണ് നേടുന്നത്.
