കൊച്ചി: ഐഎസ്എല്ലില് പ്ലേ ഓഫ് സാധ്യത സജീവമാക്കി കേരള ബ്ലാസ്റ്റേഴ്സ്. കൊച്ചിയില് നടന്ന മത്സരത്തില് പൂനെ സിറ്റി എഫ്സിയെ ഒന്നിനെതിരേ രണ്ട് ഗോളുകള്ക്ക് തോല്പിച്ചതോടെയാണ് പ്ലേ ഓഫ് സാധ്യതകള് തെളിഞ്ഞത്. ഇതോടെ പോയിന്റ് നിലയില് ബ്ലാസ്റ്റേഴ്സ് മൂന്നാം സ്ഥാനത്തെത്തി.
ദിവസങ്ങള്ക്ക് മുമ്പ് മുംബൈയോട് തകര്ന്നടിഞ്ഞ കൊമ്പന്മാര് കൊച്ചിയില് ചിറക് വിരിച്ചുയര്ന്ന കാഴ്ചയാണ് ആരാധകര് കണ്ടത്. കൊച്ചിയെ മഞ്ഞക്കടലാക്കിയ ആരാധകരെ ത്രസിപ്പിക്കും വിധമായിരുന്നു ബ്ലാസ്റ്റേഴ്സിന്റെ തുടക്കം. ഏഴാം മിനിട്ടില് ഡങ്കണ്സ് നാസോണ് ബ്ലാസ്റ്റേഴ്സിനെ മുന്നിലെത്തിച്ചു.
പിന്നീട് ലീഡ് വര്ദ്ധിപ്പിക്കാന് സി.കെ വിനീതും സംഘവും നടത്തിയ ശ്രമങ്ങളെ പൂനെയുടെ
പ്രതിരോധം ചെറുത്തു. അന്പത്തിയേഴാം മിനിട്ടില് നായകന് അരോണ് ഹ്യൂസ് ബ്ലാസ്റ്റേഴ്സ് ആരാധകരുടെ ആവേശത്തെ വാനോളമുയര്ത്തി. തൊട്ടുപിന്നാലെ അന്റോയിന് ജെര്മ്മനും മുഹമ്മദ് റാഫിയും തൊടുത്തുവിട്ട ബുള്ളറ്റ് ഷോട്ടുകള് പൂനെ ഗോളി ഏദല് തട്ടിയകറ്റി.
അവസാന മിനിട്ടുകളില് പൂനെ നടത്തിയ ചെറുത്തു നില്പ്പുകള്ക്കൊടുവിലാണ് ആശ്വാസ ഗോള് പിറന്നത്. അനിബാല് സുര്ദോയാണ് ഗോള് നേടിയത്.
