എഫ് എ കപ്പിൽ മാഞ്ചസ്റ്റർ യുണൈറ്റഡിന് വിജയം. ഒന്നിനെതിരെ രണ്ട് ഗോളുകൾക്ക് ബ്ലാക്ക് ബേൺ റോവേഴ്സിനെ തകർത്തു. മറ്റൊരു മത്സരത്തിൽ ഫുൾഹാമിനെ തകർത്ത് ടോട്ടനം ഹോട്സ്പർ ക്വാർട്ടർ ഫൈനലിലെത്തി. ടോട്ടനത്തിനായി ഹാരി കെയിൻ ഹാട്രിക് നേടി.
എഫ് എ കപ്പ് അഞ്ചാം റൗണ്ടിൽ ബ്ലാക്ക് ബേൺ റോവേഴ്സിനെതിരെ വിയർപ്പൊഴുക്കിതന്നെയായിരുന്നു മാഞ്ചസ്റ്റര്‍ യുണൈറ്റഡിന്‍റെ വിജയം. 17 ആം മിനിട്ടിൽ ആദ്യഗോൾ നേടിയതിന്‍റെ ആത്മവിശ്വാസവുമായാണ് റോവേഴ്സ് മുന്നോട്ട് പോയത്. റോവേഴ്സിന് വേണ്ടി ഡാനി ഗ്രഹാമാണ് വല ചലിപ്പിച്ചത്. കൃത്യം പത്ത് മിനിട്ട് കഴിഞ്ഞപ്പോള്‍ മാഞ്ചസ്റ്ററിന്‍റെ മറുപടി ഗോൾ. സെന്‍റർ ബോക്സിൽ നിന്നും മാർക്കസ് റാഷ്ഫോഡിന്‍റെ സൂപ്പർ ഷോട്ട്.
ആദ്യപകുതി സമനിലയിൽ പിരിഞ്ഞു. 62 ആം മിനിട്ടിൽ ആന്‍റണി മാര്‍ട്ടിയലിന് പകരം ഇബ്രഹാമോവിച്ചിനെ ഇറക്കാനുള്ള കോച്ചിന്‍റെ തീരുമാനം മാഞ്ചസ്റ്ററിന് ഗുണം ചെയ്തു. 75 ആം മിനിട്ടിൽ ഇബ്രഹാമോവിച്ചിന്‍റെ വിജയഗോൾ. പോൾ പോഗ്ബയുടെ പാസ് സെന്‍റര്‍ബോക്സിൽ നിന്നും ഗോൾ മുഖത്തേക്ക് പറക്കുകയായിരുന്നു. പകരക്കാരെ ഇറക്കിയുള്ള റോവേഴ്സിന്‍റെ തന്ത്രങ്ങളൊന്നും ഫലം കാണാതെ വന്നതോടെ 2-1 ന്‍റെ വിജയം മാഞ്ചസ്റ്ററിന് സ്വന്തം. ഹാരി കെയിനിന്‍റെ ഹാട്രിക് മികവോടെ ഫുൾഹാമിനെ തകർത്ത് ടോട്ടനം ഹോട്സ്പര്‍ എഫ് എ കപ്പ് ക്വാര്‍ട്ടർ ഫൈനർ ഉറപ്പിച്ചു.
