ധാക്ക : ഏഷ്യാകപ്പ് ഹോക്കിയിൽ പാകിസ്ഥാനെ തകർത്തുവിട്ട് ഭാരതം ഫൈനലിൽ കടന്നു . എതിരില്ലാത്ത നാലു ഗോളുകൾക്കാണ് ടീം ഇന്ത്യയുടെ ജയം .
മുപ്പത്തിയൊൻപതാം മിനുട്ടിൽ സത്ബീർ സിംഗാണ് ഇന്ത്യക്ക് വേണ്ടി ആദ്യ ഗോൾ നേടിയത് . പിന്നീട് അൻപത്തിയൊന്നാം മിനുട്ടിൽ ഹർമൻപ്രീത് സിംഗ് ലീഡ് നില ഉയർത്തി .
തൊട്ടു പിന്നാലെ ലളിത് ഉപാദ്ധ്യായയുടെ ഗോൾ പാകിസ്ഥാന്റെ പ്രതീക്ഷ നശിപ്പിച്ച് നെറ്റിൽ പതിച്ചു . അൻപത്തിയേഴാം മിനിട്ടിൽ ഗുർജന്ത് സിംഗാണ് പട്ടിക തികച്ചത് .ഈ വിജയത്തോടെ ഇന്ത്യ ഫൈനലിൽ കടന്നു
പൂൾ മാച്ചുകളിൽ ഉജ്ജ്വലഫോമിലായിരുന്ന ഇന്ത്യ മൂന്ന് തുടരൻ ജയങ്ങൾ നേടിയിരുന്നു . തുടർന്ന് ദക്ഷിണ കൊറിയക്കെതിരെ സമനില വഴങ്ങിയെങ്കിലും അടുത്ത മത്സരത്തിൽ മലേഷ്യയെ 6-2 ന് തോൽപ്പിച്ച് കരുത്ത് തെളിയിച്ചിരുന്നു.
