കൊച്ചി: ഇന്ത്യൻ സൂപ്പർ ലീഗിലെ കേരളത്തിന്റെ സ്വന്തം കേരളാ ബ്ലാസ്റ്റേഴ്സ് പുതിയ ടീം കിറ്റ് പുറത്തിറക്കി. കൊച്ചി ലുലുമാളിലും കോഴിക്കോടും നടന്ന ചടങ്ങുകളിലാണ് കിറ്റ് പുറത്തിറക്കിയത്.
കേരളത്തിന്റെ സൂപ്പർ താരം ഇയാൻ ഹ്യൂം, മലയാളി താരം റിനോ ആന്റോ അടക്കമുള്ള താരങ്ങളണിനിരന്ന ചടങ്ങിലായിരുന്നു കൊച്ചിയിലെ കിറ്റ് ലോഞ്ചിംഗ്. സികെ വിനീത്, കെ പ്രശാന്ത് അടക്കമുള്ള താരങ്ങളുടെ സാന്നിദ്ധ്യത്തിലായിരുന്നു കോഴിക്കോട്ടെ ലോഞ്ചിംഗ്.
ഇംഗ്ലണ്ട് ഫുട്ബോൾ ടീം, മാഞ്ചസ്റ്റർ യുണൈറ്റഡ് തുടങ്ങിയ ടീമുകൾക്ക് ജഴ്സി ഒരുക്കുന്ന ബ്രിട്ടീഷ് കമ്പനിയായ അഡ്മിറലാണ് ഇത്തവണ ബ്ലാസ്റ്റേഴ്സിന്റെ പുതിയ മഞ്ഞക്കുപ്പായം ഒരുക്കിയിരിക്കുന്നത്.
ആദ്യ രണ്ട് സീസണുകളിലും പ്യൂമയായിരുന്നു ബ്ലാസ്റ്റേഴ്സിന്റെ ജഴ്സി തയ്യാറാക്കിയിരുന്നത്.
ഈ മാസം 17 കൊച്ചിയിൽ നടക്കുന്ന ഉദ്ഘാടന മത്സരത്തിൽ നിലവിലെ ചാമ്പ്യൻമാരായ കൊൽക്കത്തയാണ് ബ്ലാസ്റ്റേഴ്സിന്റെ എതിരാളികൾ. കഴിഞ്ഞ രണ്ട് ഫൈനലുകളിലെ തോൽവിയ്ക്ക് പകരം വീട്ടാനാകും മഞ്ഞപ്പട ഇറങ്ങുക.