കല്പ്പറ്റയില് കഴിഞ്ഞ ദിവസം നായ്ക്കളുടെ കടിയേറ്റ് വീട്ടമ്മ മരിച്ച സംഭവത്തിനു ശേഷം വീണ്ടും വാര്ത്തകളില് ഇടം നേടുകയാണ് റോട്ട് വീലര്. ഈ വിഭാഗത്തില് പെട്ട നായ്ക്കള് മനുഷ്യനെ ആക്രമിക്കുന്നത് ഇതാദ്യത്തെ സംഭവമല്ല. മുന്പും ഇവയുടെ കടിയേറ്റ് നിരവധി പേര് മരിച്ചിട്ടുണ്ട്. ഈ അവസരത്തില് റോട്ട് വീലര് നായ്ക്കളെ കുറിച്ച് കൂടുതലറിയാം.
ലോകത്തിലെ ഏറ്റവും അക്രമണകാരിയായ പട്ടികളില് രണ്ടാമതായാണ് റോട്ട് വീലറുകളുടെ സ്ഥാനം. ‘കില്ലര് ഡോഗ്’ എന്നാണ് റോട്ട് വീലര് അറിയപ്പെടുന്നതു തന്നെ. മനുഷ്യര്ക്കു നേരെയുള്ള ഉപദ്രവം കൊണ്ടാണ് ഈ പേര് ലഭിച്ചത്. വീടുകളില് വളര്ത്താന് പറ്റിയ ഇനമാണെന്നുള്ള വിശേഷണം ഇവയ്ക്കില്ല. ഒഴിവാക്കപ്പെടേണ്ട നായ്ക്കളുടെ കൂട്ടത്തിലും ഒന്നാം സ്ഥാനം ഇവക്കാണ്.
കൃത്യമായ ട്രെയിനിംഗ് നല്കിയില്ലെങ്കില് ഇവ ഉടമസ്ഥരെപ്പോലും അക്രമിക്കും. പൊതുവെ അടങ്ങിയിരിക്കാത്ത ഇവ ശാന്തസ്വഭാവം പ്രകടിപ്പിക്കുന്നതിലും പിറകിലാണ്. ഒരാളുടെ ശ്രദ്ധ ഇവയ്ക്ക് എപ്പോഴും ആവശ്യമാണ്. അല്ലാത്ത പക്ഷം റോട്ട് വീലറുകള് അക്രമണസ്വഭാവം കാണിക്കും.
ശരിയായ ട്രെയിനിംഗ് കൊടുത്താല് ഇവയോടു ചേര്ന്നുള്ള എന്തിനെയും ഏറ്റവും സുരക്ഷിതമായി സൂക്ഷിക്കാനും ഇവക്കറിയാം. ഒന്നിനെയും പേടിയില്ലാത്ത പ്രകൃതമാണ്. എനര്ജി വളരെയധികം കൂടുതലാണ് റോട്ട് വീലറുകള്ക്ക്. അതിനാല് ഇടക്കിടക്ക് ഇവയെ വ്യായാമം ചെയ്യിപ്പിക്കേണ്ടത് അത്യാവശ്യമാണ്.
8 മുതല് 10 വയസ് വരെയാണ് റോട് വീലറിന്റെ ആയുര് ദൈര്ഘ്യം. ആണ് റോട് വീലറുകള്ക്ക് 61 മുതല് 69 സെ.മി വരെ ഉയരവും 43 മുതല് 59 വരെ ഭാരവും വയ്ക്കും. പെണ് റോട് വീലറുകള്ക്ക് 56 മുതല് 63 സെ.മി വരെ ഉയരവും 38 മുതല് 52 കിലോ വരെ ഭാരവും വയ്ക്കും.
ചരിത്രത്തില് റോട് വീലറിന് വലിയ സ്ഥാനമാണുള്ളത്. ഒന്നും രണ്ടും ലോകമഹായുദ്ധങ്ങളുടെ സമയത്ത് പോലീസ് നായ്ക്കളായി ഇതിനെ ഉപയോഗിച്ചിരുന്നു. സന്ദേശവാഹകരായും കാവലിനും ഇവയെ ഉപയോഗിച്ചിട്ടുണ്ട്. ജര്മനിയാണ് ഇവയുടെ ജന്മസ്ഥലം.