കടലിലെ വമ്പന്മാരായ തിമിംഗലങ്ങളുടെ പൂര്വികന്മാര് കരയിലൂടെ നടന്നിരുന്നു എന്ന കൗതുകകരമായ കണ്ടെത്തല് നടത്തിയിരിക്കുകയാണ് ഒരു കൂട്ടം ശാസ്ത്രജ്ഞന്മാര്. ഏറെ രസകരമായ പരിണാമമാണ് തിമിംഗലങ്ങളില് ഉണ്ടായിട്ടുള്ളത്. ഇന്നത്തെ തിമിംഗലങ്ങള് നീന്തല് വിദഗ്ധരും ആഴക്കടലില് ജീവിക്കാന് ഇഷ്ടപ്പെടുന്നവരുമാണ്. എന്നാല് 50 മില്ല്യണ് വര്ഷം മുന്പുള്ള ഇവരുടെ പൂര്വികര് കരയിലാണ് ജീവിച്ചിരുന്നത്.
ഒരു ആടിന്റെ വലിപ്പമുണ്ടായിരുന്ന ഇവ നാലു കാലിലാണ് നടന്നിരുന്നത്. ഡോള്ഫിനുകളുടെയും തിമിംഗലങ്ങളുടെയും ആദ്യ കാല രൂപം ഇങ്ങനെ ആയിരുന്നത്രെ. പാകിസെറ്റസ് എന്നാണ് ഇവ അറിയപ്പെടുന്നത്. കാഴ്ചയില് പാകിസെറ്റസ് തിമിംഗലങ്ങളില് നിന്നും തീര്ത്തും വ്യത്യസ്തരാണ്. ഇന്ത്യയിലെയും പാക്കിസ്ഥാനിലെയും കായലിന്റെയും നദികളുടെയും കരയിലാണ് ഇവ കാണപ്പെട്ടിരുന്നത്. വെള്ളത്തിലാണ് തങ്ങളുടെ വീട് എന്ന ചിന്ത പലപ്പോഴും ഇവര്ക്കുണ്ടായിരുന്നു. കരയില് കാണപ്പെട്ടിരുന്ന ചെറു മൃഗങ്ങളും ശുദ്ധ ജല മത്സ്യങ്ങളുമൊക്കെയായിരുന്നു പ്രധാന ഭക്ഷണം. ഇവയുടെ പിന്തുടര്ച്ചക്കാര് പതിയെ വെള്ളത്തിലേക്ക് കൂടു മാറാന് ആരംഭിച്ചു.
പാകിസെറ്റസിന്റെ പിന്ഗാമിയായ അംബുലോസെറ്റസ് അഴിമുഖങ്ങളിലും അവയുടെ കരയിലുമായിട്ടാണ് ജീവിച്ചത്. 48 മുതല് 50 മില്ല്യണ് വര്ഷങ്ങള്ക്കു മുന്പാണ് അംബുലോസെറ്റസ് ജീവിച്ചിരുന്നത്. പാകിസെറ്റസിനെപ്പോലെ കരയിലും വെള്ളത്തിലുമായിട്ടായിരുന്നു ഇവയുടെയും താമസം. എന്നാല് പൂര്വികരുടേതു പോലെ വലിയ കാലുകളല്ല ഇവയ്ക്ക് ഉണ്ടായിരുന്നത്. കാലുകള് ചെറുതാവുകയും ചെറിയ ചെരിവ് സംഭവിക്കുകയും ചെയ്തു. വാലുകള് നീന്താന് ഉപയോഗിക്കാന് ആരംഭിച്ചു.
അംബുലോസെറ്റസിനു ശേഷം കണ്ടെത്തിയത് ഡൊറുഡോണുകളെയാണ്. 33-40 മില്ല്യണ് വര്ഷങ്ങള്ക്കു മുന്പാണ് ഡൊറുഡോണുകളുടെ കാലഘട്ടം. അഞ്ച് മീറ്റര് നീളമുണ്ടായിരുന്ന ഈ മൃഗത്തിന് കുറുകിയ ചെരിഞ്ഞ കാലുകളാണ് ഉണ്ടായിരുന്നത്. നല്ലൊരു നീന്തല്ക്കാരനായി മാറിയ ഡൊറുഡോണ് പൂര്ണമായും വെള്ളത്തിലാണ് ജീവിച്ചത്. 10 മില്ല്യണ് വര്ഷമാണ് പാകിസെറ്റസില് നിന്നും ഡൊറുഡോണിലേക്കുള്ള യാത്രയ്ക്ക് വേണ്ടി വന്നത്. ഈ കാലഘട്ടത്തിനുള്ളില് ഇവ പൂര്ണമായും വെള്ളത്തില് ജീവിക്കുന്ന ജീവിയായി മാറി. ഡൊറുഡോണ് പരിണമിച്ചാണ് ഇന്നു കാണുന്ന തിമിംഗലങ്ങളുടെ രൂപത്തിലേക്ക് എത്തുന്നത്.
