ലക്നൗ: പാമ്പുകള് മനുഷ്യനെ കടിക്കുന്നത് വളരെ സാധാരണമായ സംഭവമാണ്. എന്നാല് പാമ്പു കടിക്കാന് വന്നെന്ന് പറഞ്ഞ് പാമ്പിനെ തിരിച്ചു കടിച്ചാലോ. അങ്ങനെയും സംഭവിക്കാം എന്നു തെളിയിക്കുകയാണ് ഉത്തര്പ്രദേശിലെ ഹര്ദോയിയില് നടന്ന ഈ സംഭവം. സോനേലാല് എന്ന കര്ഷകനാണ് ഈ ചെയ്തിയിലൂടെ കൗതുകമായത്.
ഒരാള്ക്ക് പാമ്പു കടിയേറ്റെന്നും ഉടനെ തന്നെ ആംബുലന്സ് അയക്കണമെന്നും ആവശ്യപ്പെട്ടാണ് കമ്മ്യൂണിറ്റി ഹെല്ത്ത് സെന്ററിലേക്ക് ഫോണ് കോള് എത്തുന്നത്. വൈകിട്ട് ഏഴു മണിയോടെ ഇയാളെ ആശുപത്രിയില് പ്രവേശിപ്പിക്കുകയും ചെയ്തു. അയല്ക്കാരാണ് സോനേലാലിന് പാമ്പുകടിയേറ്റെന്ന് ഡോക്ടര്മാരോട് പറയുന്നത്. എന്നാല് ഡോക്ടര്മാര്ക്ക് ഇയാളുടെ ശരീരത്തില് പാമ്പു കടിയേറ്റതിന്റെ ലക്ഷണങ്ങളൊന്നും കണ്ടെത്താനായില്ല. ശരീരത്തില് അടയാളങ്ങളൊന്നും ഉണ്ടായിരുന്നില്ല. തുടര്ന്ന് ഡോക്ടര്മാര് ഇയാളെ നിരീക്ഷണത്തില് വച്ചു.
10 മണിയോടു കൂടി സോനേലാലിന് ബോധം വരുമ്പോഴാണ് എല്ലാവരും സംഭവത്തിന്റെ സത്യാവസ്ഥ അറിയുന്നത്. കൃഷിസ്ഥലത്ത് നില്ക്കുമ്പോഴാണ് പാമ്പ് സോനേലാലിനെ കടിക്കാന് ആയുന്നത്. ദേഷ്യം വന്ന സോനേലാല് പാമ്പിന്റെ തല ചവച്ചരച്ച ശേഷം തുപ്പിക്കളയുകയായിരുന്നു. പാമ്പു കടിക്കാനെത്തിയതിന്റെ പ്രതികാരമായിട്ടാണ് പാമ്പിന്റെ തല കടിച്ചു പറിച്ചത്. ഇങ്ങനെ ചെയ്തതു കൊണ്ട് പാമ്പിന്റെ വിഷം ഇയാളുടെ ശരീരത്തിലെത്തുകയും ബോധരഹിതനാവുകയുമായിരുന്നു.
വാര്ത്ത അറിഞ്ഞതിനു ശേഷം നിരവധി ആളുകളാണ് സോനേലാലിനെ കാണാന് ആശുപത്രിയില് എത്തുന്നത്. ഡോക്ടര്മാരും ആകെ അമ്പരപ്പിലാണ്. ഇത്തരമൊരു സംഭവം കേട്ടു കേള്വി ഇല്ലെന്ന് ഡോക്ടര്മാരും പറയുന്നു. അതേസമയം സോനേലാല് മാനസിക വൈകല്യങ്ങള് പ്രകടിപ്പിക്കുന്നതായും മയക്കുമരുന്നിന് അടിമയാണെന്ന് നാട്ടുകാര് പറഞ്ഞു.
