Special

ബ്രിട്ടനെ വിറപ്പിച്ച റാണി, കിട്ടൂർ ചെന്നമ്മ

ശക്തി ശാലിനി ദുർഗ്ഗാ നീയേ - വനിത ദിനം സ്പെഷ്യൽ

ബ്രിട്ടീഷ് സാമ്രാജ്യത്വത്തെ വിറപ്പിച്ച തെന്നിന്ത്യയുടെ റാണിയായിരുന്ന കിട്ടൂർ ചെന്നമ്മ ധീരതയുടെയും ഭരണ നൈപുണ്യത്തിന്റെയും സ്വദേശാഭിമാനത്തിന്റെയും പ്രതീകമായിരുന്നു

1778 ൽ കർണാടകയിലെ കിട്ടൂരിലായിരുന്നു റാണി ചെന്നമ്മയുടെ ജനനം . കുട്ടിക്കാലത്തു തന്നെ വാൾപ്പയറ്റിലും അശ്വാഭ്യാസത്തിലും അമ്പെയ്ത്തിലും നിപുണയായിരുന്നു അവർ . തുടർന്ന് കിട്ടൂരിന്റെ ഭരണ സാരഥ്യമേറ്റെടുത്ത അവർ രാജ മല്ലസർജയെ വിവാഹം ചെയ്തു . ഒരു മകനുണ്ടായിരുന്നത് അകാലത്തിൽ മരിച്ചതോടെ ശിവലിംഗപ്പ എന്ന കുമാരനെ റാണി ദത്തെടുത്തു . എന്നാൽ ഡൽഹൗസി പ്രഭുവിന്റെ ദത്തപഹാരനയം ചൂണ്ടിക്കാട്ടി ബ്രിട്ടീഷുകാർ അത് നിരസിച്ചു. ബ്രിട്ടീഷുകാരുടെ തീരുമാനം റാണി ചെന്നമ്മ അംഗീകരിച്ചില്ല

ബ്രിട്ടീഷ് സാമ്രാജ്യത്വത്തിന്റെ അപ്രമാദിത്വം ചോദ്യം ചെയ്ത റാണി ചെന്നമ്മയ്ക്കെതിരെ യുദ്ധം പ്രഖ്യാപിക്കപ്പെട്ടു . 200 സൈനികരുമായി കിട്ടൂർ ആക്രമിച്ച ബ്രിട്ടീഷുകാർ മുന്നിൽ നിന്നു പോർ നയിച്ച റാണിക്കു മുന്നിൽ തോറ്റോടി . കളക്ടർ ജോൺ താക്കർ കൊല്ലപ്പെട്ടു . ബ്രിട്ടീഷ് ഓഫീസർമാരായ വാൾട്ടർ ഏലിയട്ടും സ്റ്റീവൻസണും തടവുകാരായി . യുദ്ധം ഒഴിവാക്കാം എന്ന് ഇംഗ്ലീഷ് സൈനികത്തലവൻ സമ്മതിച്ചതിനാൽ രണ്ടു ഓഫീസർമാരെയും റാണി വിട്ടയച്ചു . എന്നാൽ റാണി വഞ്ചിക്കപ്പെട്ടു

കൂടുതൽ പേരുമായി യുദ്ധത്തിനെത്തിയ ബ്രിട്ടീഷുകാരോട് സധീരം പോരാടിയെങ്കിലും ചെന്നമ്മ തടവുകാരിയാക്കപ്പെട്ടു . ബലിഹൊങ്കൽ കൊട്ടാരത്തിലെ തടങ്കൽ പാളയത്തിൽ വച്ച് 1829 ഫെബ്രുവരി 21 ന് ആ ധീര വനിത അന്ത്യശ്വാസം വലിച്ചു . ഝാൻസിയിലെ റാണി ലക്ഷ്മീ ഭായി ജനിക്കുന്നതിന് അര നൂറ്റാണ്ട് മുൻപ് ബ്രിട്ടീഷ് മേധാവിത്വത്തെ എതിർത്ത ആദ്യ വനിതാ ഭരണാധികാരിയായി റാണി ചെന്നമ്മയെ കണക്കാക്കുന്നു

റാണി ചെന്നമ്മ നേടിയ ഐതിഹാസികമായ വിജയം ഇന്നും കർണാടകയിൽ ആഘോഷിക്കപ്പെടുന്നു . പാർലമെന്റിൽ റാണിയുടെ പ്രതിമ സ്ഥാപിച്ച് ഭാരതസർക്കാർ അവരെ ആദരിച്ചു . ബ്രിട്ടീഷുകാരുടെ പാദ സേവ ചെയ്യാൻ മത്സരിച്ച നാട്ടു രാജാക്കന്മാരുടെയിൽ സ്വാഭിമാനമുള്ള വനിതാ ഭരണാധികാരിയായി ജ്വലിച്ചു നിന്ന റാണി ചെന്നമ്മ സ്വാതന്ത്ര്യ സമരഗാഥയിലെ തിളങ്ങുന്ന അദ്ധ്യായമാണ്.

40 Shares

Please scroll down for comments

Close
Close